पाडेगाव ऊस संशोधन केंद्राचा होणार कायापालट! राज्य सरकारचा निर्णय, काय परिणाम होणार?

पाडेगाव येथे महात्मा फुले कृषी विद्यापीठाचे ऊस संशोधन केंद्र आहे. या केंद्राची स्थापना स्वातंत्र्यपूर्व काळात १९३२ मध्ये झाली होती. मांजरी (पुणे) येथून हे केंद्र पाडेगावला स्थलांतरीत केले होते. या केंद्रातील विविध विकास कामांसाठई ४० कोटी रुपयांची तरतूद करण्यात आली असून, त्यात नवीन प्रशासकीय इमारत बांधण्यासाठी १४ कोटी ९२ लाख ५६ हजार रुपये, कर्मचारी निवासस्थानाच्या बांधकामासाठी ११ कोटी १२ लाख २८ हजार रुपये आणि शेतकरी प्रशिक्षण केंद्र तथा अतिथीगृहाच्या बांधकामासाठी १४ कोटी ८६ लाख २७ हजार रुपये, अशी एकूण ४० कोटी ९१ लाख १० हजार रुपयांची तरतूद करण्यात आली आहे.

या संशोधन केंद्रावर राज्यातील व राज्याबाहेरील शास्त्रज्ञ, इतर वरिष्ठ अधिकारी, विद्यापीठातील वरिष्ठ अधिकारी, कृषी विभागातील अधिकारी व शास्त्रज्ञ सतत भेट देत असतात. राज्यभरातून शेतकऱ्यांचेही अभ्यास दौरे येथे आयोजित करण्यात येतात. प्रक्षेत्रावर काम करणाऱ्या कर्मचाऱ्यांसाठीही राहण्याची योग्य सोय नव्हती त्यामुळे सुसज्ज प्रशासकीय भवन, अतिथीगृह आणि कर्मचारी निवासाची गरज होती.

पाडेगाव ऊस संशोधन केंद्राचे महत्व काय

पाडेगाव ऊस संशोधन केंद्र हे सातारा जिल्ह्यातील पाडेगाव येथे आहे. हे केंद्र महाराष्ट्रातील ऊस संशोधन कार्याचे प्रमुख केंद्र आहे. १९३२ मध्ये याची स्थापना झाली आणि ते महात्मा फुले कृषी विद्यापीठा, राहुरीच्या अंतर्गत काम करते.

पाडेगाव ऊस संशोधन केंद्राने आतापर्यंत उसाच्या अनेक जाती विकसित केल्या आहेत, ज्यांचा महाराष्ट्रातील ऊस उत्पादनात मोठा वाटा आहे. त्यांनी विकसित केलेल्या काही प्रमुख जातींमध्ये फुले ऊस ८६०३२, फुले ऊस ०२६५, फुले ऊस १०१, आणि फुले ऊस ९०५७ यांचा समावेश आहे. त्यांनी फुले २२० या नवीन जातीसह आणखी तीन जाती विकसित केल्या आहेत, ज्या ६५ टनांपेक्षा जास्त उत्पादन देतात. १९८६ मध्ये गो ८६०३२ आणि २००७ मध्ये फुले ऊस २६५ या जाती प्रसारित करण्यात आल्या.