रेल्वेगाड्यांवर जाहिरातबाजी करून मध्य रेल्वेची ८ कोटींची कमाई

भारतीय रेल्वेत महसूल वाढविण्यासाठी रेल्वेमंत्र्यांनी न्यू इनोव्हेटिव्ह नॉन फेअर रेव्हेन्यू आयडीयाज स्कीम आणली आहे. यामार्फत महसूल वाढविण्यासाठी अनेक योजना राबवणे सुरू आहे. रेल्वे गाड्या, स्थानके तसेच इतर ठिकाणी जाहिरातींसाठी जागा भाड्याने देणे यांसारख्या भाडेतत्त्वावरील उपक्रमांमधून महसूल मिळविला जात आहे. मागील आर्थिक वर्षाच्या तुलनेत चालू आर्थिक वर्षात महसुलात २ टक्क्यांची वाढ झाली आहे.

रेल्वे प्रवासात, रेल्वे स्थानकात मौल्यवान वस्तू चोरीला जाणाऱ्या घटना मोठ्या प्रमाणात घडतात. यांसह रेल्वे स्थानकावर इच्छित गाडी येण्यास विलंब असेल आणि प्रवाशांकडे मौल्यवान सामग्री कुठे ठेवायचे, असा प्रश्न प्रवाशांना पडतो. त्यासाठी मध्य रेल्वेने लॉकरची सुविधाही उपलब्ध करून दिली आहे. सीएसएमटी, दादर, एलटीटी, कल्याण येथे डिजी लाॅकरची सुविधा प्रवाशांसाठी उपलब्ध आहे. तसेच वुलू, डिजी लॉकर्स इत्यादी विविध उपक्रमांद्वारे जाहिरात करून, १.२६ कोटी रुपयांचा महसूल मिळाला आहे.

भाडे-व्यतिरिक्त (नॉन-फेअर) महसूल

• मुंबई विभागातून ५०.३६ कोटी रुपयांचा महसूल
• पुणे विभागातून ७.६२ कोटी रुपयांचा महसूल
• भुसावळ विभागातून ३.६१ कोटी रुपयांचा महसूल
• नागपूर विभागातून २.७४ कोटी रुपयांचा महसूल
• सोलापूर विभागातून १.१४ कोटी रुपयांचा महसूल

• अॅप आधारित उपक्रमांवर जाहिरातबाजी – ८.०३ कोटी रुपये
• स्थानकांवरील जाहिराती प्रदर्शन – ३.४८ कोटी रुपये
• इलेक्ट्रिक वाहनांसाठी चार्जिंग पॉइंट, स्लीपिंग पॉड्स इत्यादी उपक्रम – २.८० कोटी रुपये
• एक्सप्रेस गाड्यांच्या आतील आणि बाहेरील भागात जाहिरात – ८.३८ कोटी रुपये
• स्थानकांव्यतिरिक्त इतर होर्डिंग्जवर जाहिरात – २६.४४ कोटी रुपये
• वोलू, डिजी लॉकर्स इत्यादी विविध उपक्रमांद्वारे जाहिरात – १.२६ कोटी रुपये

प्रवासीभिमुख सेवा प्रदान

• लोकमान्य टिळक टर्मिनस, कल्याण, पनवेल आणि लोणावळा स्थानकांवर प्रवाशांच्या सुविधेसाठी आरामदायक मसाज खुर्च्या
• लोकमान्य टिळक टर्मिनस आणि कांजुरमार्ग स्थानकांवर विद्युत वाहनांसाठी बॅटरी स्वॅपिंग स्थानक
• कल्याण स्थानकावर डिजी लॉकर सुविधा
• बँकिंग आणि विमा उत्पादने आणि सेवांचा प्रचार