धुळे : येथील औद्योगिक वसाहतीत वाढीव बांधकामास मंजुरी मिळवून देण्यासाठी २५ हजाराची लाच स्वीकारताना लाचलुचपत प्रतिबंधक विभागाच्या अधिकाऱ्यांनी एका खासगी बांधकाम सल्लागार अभियंत्याला रंगेहात पकडले. धुळे तालुक्यातील अवधान औद्योगिक वसाहतीत एका व्यक्तीला वाढीव बांधकाम करावयाचे होते. यासाठी त्याने औद्योगिक विकास महामंडळाच्या कार्यकारी अभियंत्यांकडे प्रकरण दिले होते. परंतु, कार्यवाही होत नव्हती. अहमद अन्सारी (३२, रा.इस्लामपुरा, धुळे) या खासगी बांधकाम सल्लागार तथा अभियंत्याने संबंधित अधिकाऱ्यांवर आपला प्रभाव टाकून हे प्रलंबित काम मार्गी लावून देण्यासाठी २५ हजार रुपयांची मागणी केली. त्यानंतर संबंधित व्यक्तीने लाचलुचपत प्रतिबंधक विभागाच्या अधिकाऱ्यांशी संपर्क साधला. तक्रारीच्या आधारावर प्राथमिक खात्री करुन विभागाने सापळा रचला. हेही वाचा : गिरीश महाजन यांच्याविषयी आक्षेपार्ह मजकूर; धुळ्यात डॉक्टराविरुध्द गुन्हा, वाहनाची तोडफोड २५ हजाराची लाच स्वीकारताना अहमद अन्सारी यास रंगेहात पकडले. ही कारवाई लाचलुचपत प्रतिबंधक विभागाचे उपअधीक्षक अभिषेक पाटील यांच्यासह त्यांच्या पथकातील निरीक्षक रूपाली खांडवी, राजन कदम, शरद कटके,संतोष पावरा,मकरंद पाटील, प्रशांत बागूल,सुधीर मोरे यांनी केली. कोणत्याही शासकीय अधिकारी, कर्मचारी यांनी किंवा त्यांच्या वतीने खासगी व्यक्तीने कोणतेही शासकीय काम करून देण्यासाठी लाचेची मागणी केल्यास लाचलुचपत प्रतिबंधक विभागाशी संपर्क साधावा, असे आवाहन करण्यात आले आहे.
