धुळे: दिल्लीहून मुंबईकडे बेकायदेशीरपणे होणारी गुटख्याची वाहतूक धुळे पोलिसांनी रोखली असून कंटेनरसह ४८ लाख ४३ हजार ४४४ रुपयांचा मुद्देमाल जप्त केला. याप्रकरणी चालकास अटक करण्यात आली असून त्याच्यासह पाच जणांविरुद्ध गुन्हा दाखल झाला आहे.
मुंबई-आग्रा महामार्गावर धुळ्याजवळील सोनगीर टोल नाक्याजवळ ही कारवाई झाली. याप्रकरणी अन्न व औषध प्रशासन विभागाचे अन्न सुरक्षा अधिकारी अनिल पगार यांनी तक्रार दिली. तंबाखुजन्य पदार्थांना महाराष्ट्रात प्रतिबंध असताना दिल्लीहून मुंबईकडे गुटख्याची वाहतूक होणार असल्याची माहिती अधिकाऱ्यांना मिळाली होती. या अनुषंगाने सोनगीर टोल नाक्याजवळ पथक तैनात करण्यात आले होते.
हेही वाचा… घर रिकामे करण्यासाठी खंडणीची मागणी; धुळ्यात भाडेकरुंच्या धमकीमुळे घरमालकाची आत्महत्या
संशयित कंटेनर येताच पोलिसांच्या मदतीने तो अडविण्यात आला. तपासणी करण्यात आली असता प्रतिबंधित पानमसाला, गुटखा सदृश्य माल आढळला. दिल्लीहून मुंबईकडे हा माल नेण्यात येत असल्याची कबुली चालकाने दिली. पोलिसांनी या प्रकरणी चालक दिलीपकुमार दुबे (रा. कुसवडा, उत्तरप्रदेश) यास अटक केली. रिंकूसिंग (रा. दिल्ली), सिकंदर (रा. मुंबई), राजेश आणि कंटेनर मालकाविरूद्ध सोनगीर पोलीस ठाण्यात गुन्हा दाखल करण्यात आला आहे.
