पुणे : जिल्ह्यातील नगरपरिषदा आणि नगरपंचायतीच्या प्रारूप मतदारयादीवर हरकती-सूचना नोंदविण्यास मुदतवाढ देण्याचा निर्णय घेण्यात आला आहे. राज्य निवडणूक आयोगाने केलेल्या सूचनेनुसार ही मुदत येत्या शुक्रवारपर्यंत (१७ ऑक्टोबर) वाढविण्यात आल्याची माहिती जिल्हा प्रशासनाकडून देण्यात आली.
जिल्ह्यातील चौदा नगरपरिषदा आणि तीन नगरपंचायतीच्या सार्वत्रिक निवडणुकीसाठी आठ ऑक्टोबर रोजी प्रारूप मतदारयादी जाहीर करण्यात आली होती. त्यावर हरकती-सूचना नोंदविण्यासाठी सोमवार पर्यंत (१३ ऑक्टोबर) मुदत देण्यात आली होती. मात्र, हरकती-सूचना नोंदविण्यासाठी मुदतवाढ देण्यात आली आहे. प्रारूप मतदारयादीवरील हरकती-सूचना नागरिकांनी शुक्रवारपर्यंत द्याव्यात, असे आवाहन नगरपालिका शाखेचे प्रशासकीय अधिकारी व्यंकटेश दुर्वास यांनी केले आहे.
नागरिकांकडून प्राप्त झालेल्या हरकती आणि सूचनांवर विचार करून येत्या ३१ ऑक्टोबर रोजी अंतिम मतदारयादी जाहीर केली जाणार आहे. नागरिकांच्या सूचना आणि हरकती संबंधित नगरपरिषद तसेच नगरपंचायत कार्यालयात स्वीकारण्यात येणार असल्याचे दुर्वास यांनी स्पष्ट केले.
दरम्यान, जिल्ह्यातील नगरपरिषदा आणि नगरपंचायतींच्या नगराध्यक्षपदासाठीचे आरक्षण गेल्या आठवड्यात निश्चित करण्यात आले आहे. आरक्षण लक्षात घेऊन इच्छुकांकडून नव्याने मोर्चेबांधणीही सुरू झाली आहे. जिल्ह्यातील चौदा नगरपरिषदांपैकी चार ठिकाणी आणि चार नगरपंचायतींपैकी तीन ठिकाणच्या नगराध्यक्षपदावर महिलांना संधी मिळणार आहे. आठ नगरपरिषदांची नगराध्यक्षपदे सर्वांसाठी खुली राहणार आहेत. जिल्हा प्रशासनाकडून यापूर्वीच नगर परिषदा आणि नगरपंचायतींच्या प्रारूप प्रभागरचनेचा आराखडा तयार करण्यात आला आहे.
