पुणे : शाळकरी मुलीचा विनयभंग केल्याप्रकरणी एका शाळेतील क्रीडा शिक्षकाला चंदननगर पोलिसांनी अटक केली. मंगेश बोराटे (वय ४०, रा. चंदननगर) असे अटक करण्यात आलेल्याचे नाव आहे. याबाबत शाळकरी मुलीच्या आईने चंदननगर पोलीस ठाण्यात फिर्याद दिली आहे. बोराटे याच्याविरुद्ध विनयभंग, तसेच बालकांचे लैंगिक अत्याचाारांपासून संरक्षण कायद्यातील कलमांन्वये (पोक्सो) गुन्हा दाखल करण्यात आला आहे.
पोलिसंनी दिलेल्या माहितीनुसार, १४ वर्षीय पीडित मुलगी चंदननगर भागातील एका शाळेत आहे. आरोपी बोराटे हा क्रीडा शिक्षक आहे. ‘मुलींनी चांगला व्यायाम केला तर त्यांच्याकडे मुले बघतील. तुला मित्र आहे का ?, तसेच मुली हसल्यानंतर मुलांची धडकन वाढते’, असे पीडित मुलीला बोराटे म्हणाला होता. वर्गात असे प्रश्न विचारल्याने मुलीच्या मनात लज्जा निर्माण झाली, असे मुलीच्या आईने दिलेल्या फिर्यादीत म्हटले आहे. आईने पोलिसांकडे याबाबत तक्रार दिल्यानंतर बोराटे याला अटक करण्यात आली. पोलीस उपनिरीक्षक मोरे तपास करत आहेत.
प्रेमसंबंधास नकार दिल्याने मारहाण
प्रेमसंबंध ठेवण्यास नकार दिल्याने एका तरुणीला मारहाण करण्याची घटना शिवाजीनगर भागात घडली. याप्रकरणी शिवाजीनगर पोलिसांनी शिवसागर मदन गौड (वय २५, रा. मंगळवार पेठ) याच्याविरुद्ध गुन्हा दाखल केला. याबाबत एका तरुणीने फिर्याद दिली आहे. आरोपी गौड आणि तरुणीची ओळख होती. ओळखीतून त्यांच्यात प्रेमसंबध निर्माण झाले.
गौड याच्या वर्तनामुळे तरुणीने त्याला प्रेमसंबध ठेवण्यास नकार दिला. तरुणीने त्याला झिडकारल्यानंतर गौडने तिला मारहाण केली. मोबाइलवर काढलेली छायाचित्रे समाजमाध्यमात प्रसारित करण्याची धमकी दिली, असे तरुणीने फिर्यादीत म्हटले आहे. पोलीस हवालदार बांबळे तपास करत आहेत. हडपसर भागात एका मुलीने प्रेमसबंध ठेवण्यास नकार दिल्याने तिला धमकावून मारहाण करण्यात आल्याची घटना घडली. याप्रकरणी ज्ञानेश्वर रमेश शिंदे (वय २०, रा. हडपसर) याच्याविरुद्ध गुन्हा दाखल करण्यात आला असून, १६ वर्षीय मुलीने याबाबत हडपसर पोलीस ठाण्यात फिर्याद दिली आहे. पोलीस उपनिरीक्षक कोलेवाड तपास करत आहेत.
