पिंपरी-चिंचवडमध्ये मराठी पत्रकार परिषदेच्या ४३व्या राष्ट्रीय अधिवेशनात बोलताना राष्ट्रवादी काँग्रेसच्या खासदार सुप्रिया सुळे यांनी चॅनेलमधील मुलींनी साडी नेसण्याबद्दल विधान केलं होतं. त्यांच्या या विधानावरून अनेक राजकीय नेत्यांनी टीका केली होती. तसेच भाजपाच्या चित्रा वाघ यांनीही टीका करत त्यांचा व्हिडिओ ट्विटरवर शेअर केला होता. दरम्यान, या टीकेवर आता सुप्रिया सुळे यांनी उत्तर दिलं आहे. टीका करणं चुकीचं नाही, तो त्यांचा अधिकार आहे, असे त्या म्हणाल्या. यावेळी त्यांनी राज्यपालांच्या विधानाचाही निषेध केला. पुण्यात पत्रकारांशी बोलताना त्यांनी यांसदर्भात प्रतिक्रिया दिली.
काय म्हणाल्या सुप्रिया सुळे?
“माझं भाषण सुरू होण्यापूर्वी तिथे एक व्यापक चर्चा सुरू होती. त्या चर्चेला उद्देशून मी अनेक मुद्दे मांडले. मी या भाषणता कोणावरही टीका केली नाही. मी फक्त माझं मत मांडलं. कोणी काय घालावे, हा ज्याचा त्याचा वयक्तिक प्रश्न आहे, हे सुद्धा म्हटले होते. त्यामुळे ते भाषण सर्वांनी पूर्ण ऐकावे. माझं ३५ मिनिटांचे जर भाषण १७ सेकंदमध्ये दाखवण्यात येत असेल तर त्यावर काय बोलणार” , अशी प्रतिक्रिया सुप्रिया सुळे यांनी दिली.
हेही वाचा – फडणवीसांनी राज्यपालांची पाठराखण केल्यानंतर संजय राऊत आक्रमक; म्हणाले “म्हणजेच तुम्ही छत्रपती शिवाजी महाराज…”
विरोधकांच्या टीकेला उत्तर
यावेळी बोलताना त्यांनी चित्रा वाघ यांनी केलेल्या टीकेवरही प्रतिक्रिया दिली. “मी संविधानावर विश्वास ठेवणारी नागरिक आहे. त्यामुळे कोणी माझ्यावर टीका करत असेल, तर त्यात चुकीचं काहीही नाही. तो त्याचा अधिकार आहे. माझी आई मला नेहमी सांगते की, ‘निंदकाचे घर असावे शेजारी’ त्यामुळे अशा टीकेचं मी स्वागत करते”, असेही त्या म्हणाल्या.
हेही वाचा – “एकदा मी अब्दुल सत्तारांना माईकने मारणार होतो, पण…”; हिरवा साप म्हणत चंद्रकांत खैरेंची सडकून टीका
राज्यपालांच्या विधानाचाही केला निषेध
दरम्यान, यावेळी राज्यापालांच्या विधानाचाही त्यांनी निषेध केला. “राज्यपालांकडून जी विधानं होत आहेत, हा जाणीवपूर्वक केलेला प्रकार आहे. त्या पदाला न शोभणारा हा प्रकार आहे. त्यांच्याकडून महाराष्ट्राच्या संस्कृतीला काळं बोट लावण्याचा प्रयत्न सुरू आहे. हे दुर्देवी आहे. सातत्याने महाराष्ट्राची बदनामी होत आहे” , अशी प्रतिक्रिया त्यांनी दिली.
