कल्याण – महात्मा फुले पोलीस ठाण्यातील हवालदार सतीश सोनवणे यांच्या सतर्कतेमुळे कल्याण रेल्वे स्थानकातून सोमवारी रात्री एका तरूणाने चोरलेल्या बाळाचा शोध पोलिसांनी चोरीनंतर सहा तासाच्या अवधीत घेतला. कल्याण रेल्वे स्थानकातून एका जोडप्याचे आठ महिन्याचे बाळ सोमवारी मध्यरात्री एका तरूणाने चोरले होते. यासंदर्भात कल्याण लोहमार्ग पोलिसांनी दाखल तक्रारीप्रमाणे चोरीचे चित्रीकरण समाज माध्यमांत प्रसारित केले होते. या चित्रीकरणाच्या आधारे महात्मा फुले पोलिसांनी तत्पर हालचाली करून चोरीस गेलेले बाळ जोडप्याला परत केले.
साहाय्यक पोलीस आयुक्त कल्याणजी घेटे यांनी ही माहिती दिली. पुणे येथील नीलेश आणि पूनम कुंचे हे कष्टकरी कुटुंब मोलमजुरीच्या निमित्ताने कल्याणमध्ये आले आहे. दिवसभर मजुरी करून ते उपजीविका करतात. राहण्यास जागा नाही. त्यात पाऊस सुरू असल्याने हे जोडपे आपल्या आठ महिन्याच्या बाळासह रात्रीच्या वेळेत निवारा म्हणून कल्याण रेल्वे स्थानकातील एका आडोशाला येते.
सोमवारी दिवसभर मजुरीचे काम करून हे जोडपे कल्याण रेल्वे स्थानक भागात विश्रांतीसाठी आले. मध्यरात्रीच्या वेळेत गाढ झोपेत असताना या दाम्पत्याजवळ असलेले आठ महिन्याचे बाळ एका तरूणाने चोरून नेले. हे जोडपे सकाळी जागे झाले तेव्हा त्यांना आपले बाळ गायब असल्याचे दिसले. बाळ गायब असल्याचे समजताच आई पूनम हिने हंबरडा फोडला. या महिलेचा हंबरडा पाहून इतर महिला प्रवाशांना गहिवरून आले.
जागरूक प्रवाशांनी या जोडप्याला कल्याण लोहमार्ग पोलीस ठाण्यात तक्रार देण्यास सांगितले. नीलेश कुंचे यांनी पोलीस ठाण्यात तक्रार दाखल केल्यावर पोलिसांनी बाळ चोरीला गेल्याच्या भागातील सीसीटीव्ही चित्रण तपासले. त्यावेळी मध्यरात्रीच्या सुमारास एक तरूण हळूच हे जोडपे असलेल्या फलाटावरील ठिकाणी येऊन बाळाला चोरून नेत असल्याचे दिसले. पोलिसांनी हे चित्रण समाज माध्यम, पोलीस दलातील व्हाॅट्सप गटावर प्रसारित केले.
हे चित्रण कल्याणमधील महात्मा फुले पोलीस ठाण्यातील हवालदार सतीश सोनवणे यांच्या निदर्शनास आले. त्यांना चोरी करणारा इसम हा परिचित आणि रात्रीच महात्मा फुले पोलीस ठाण्यात एका भांडण प्रकरणात आला होता, असे आढळले. सोनवणे यांनी ही माहिती वरिष्ठ पोलीस निरीक्षक परदेशी यांना दिली. बाळाच्या शोधासाठी दोन तपास पथके परदेशी यांनी तयार केली. रात्री दाखल गुन्ह्यातील पत्त्यावर एक पथक गेले आणि अन्य भागात एक पथक रवाना झाले.
या पथकाने महात्मा फुले पोलीस ठाण्यात दाखल गुन्ह्यातील पत्त्यावर छापा टाकला. त्यावेळी त्यांना अक्षय खरे आणि त्याची आत्या सविता खरे यांच्या ताब्यात कल्याण रेल्वे स्थानक भागातून अपहरण केलेले बाळ आढळले. पोलिसांनी पहिले बाळाचा ताबा घेतला. अक्षय, सविता खरे यांना पोलीस ठाण्यात आणले.
महात्मा फुले पोलिसांनी हे बाळ लोहमार्ग पोलिसांच्या माध्यमातून सुखरूपपणे बाळाच्या आईच्या ताब्यात दिले, अशी माहिती साहाय्यक आयुक्त घेटे यांनी दिली. अक्षय, सविताने या बाळाचे कशासाठी अपहरण केले होते या दिशेने पोलिसांनी चौकशी सुरू केली आहे.
