धुळे-चाळीसगाव पॅसेंजर गाडी प्रसाधनगृहाविना

कमी अंतरातील प्रवासाचे कारण पुढे करीत रेल्वे प्रशासनाने धुळे-चाळीसगाव या पॅसेंजर गाडीतील प्रसाधनगृह बंद केले आहे. त्यासाठी रेल्वेचे नियम दाखविण्यात येतात. या अनाकलनीय नियमांमुळें रक्तदाब, मधुमेही, मुत्रपिंड आजाराने ग्रस्त रूग्णांसह महिलांची गैरसोय होते. यामुळे प्रसाधनगृह सुरू करण्याची गरज आहे.
मनमाड-इंदूर या बहुचर्चित रेल्वे मार्गाच्या प्रत्यक्ष कामाला सुरूवात कधी होते किंवा हा रेल्वे मार्ग तयार होण्याबाबत बहुतेकांना अजूनही शाश्वती नसल्याने धुळे-चाळीसगाव या अस्तित्वातील रेल्वे मार्गाने प्रवास करणाऱ्यांना सोयी-सुविधा उपलब्ध करून देण्याबाबत आता विविध संघटनांसह अनेकांनी आवाज उठविण्याचे ठरविले आहे. काही अजब जाचक अटी व नियमांमुळे रेल्वे विभागाच्या एकूण कामांच्या तुलनेत अक्षरश: सर्वार्थाने किरकोळ आणि सहज करता येण्यासारखी सेवाही वर्षांनुवर्षे खंडित झाली आहे.
रेल्वे विभागाने प्रसाधनगृह बंद ठेवण्याचा अमानवी आणि मूलभूत अधिकारांचे हनन करणारा निर्णय रद्द करावा, सर्व प्रसाधनगृहे पूर्ववत सुरू करावी अशी मागणी अ‍ॅड. जवाहर पाटील यांनी या विभागाकडे केली आहे. रेल्वेच्या मुख्य अभियंत्यांचे सचिव पी. एम. कुलकर्णी यांची अ‍ॅड. पाटील यांनी भेट घेतली. धुळे-चाळीसगाव पॅसेंजरमध्ये असलेल्या सोयी-सुविधांचा अभाव आणि प्रवाशांच्या गरजा या संदर्भात निवेदन त्यांना दिले. ब्रिटीश काळातील या रेल्वे मार्गावर आजही पूर्वी सारखीच जुन्या जमान्यातील सेवा देण्यात येत असल्याची जाणीव करून देण्यात आली. रेल्वे स्थानकाच्या आधुनिकीकरणाची नितांत गरज असताना प्रशासनाकडून होणारे दुर्लक्ष किंवा टोलवाटोलवीची उदाहरणेही अ‍ॅड. पाटील यांनी यावेळी दिली. विभागाने धुळ्यासाठी वाढीव डबे दिले असले तरी केवळ तीन-चार डब्यांसाठी फलाट वाढविण्याची तसदी घेण्यात आलेली नाही. त्यामुळे धुळे थांब्यावर रेल्वे आल्यानंतर वाढीव डबे आणि कमी लांबीचा फलाट अशी स्थिती दिसते. अशी स्थिती अपघातासाठी आमंत्रण देणारी ठरू शकते. अपूर्ण फलाटामुळे प्रवाशांना जमिनीवर थांबावे लागते. त्यांना जमिनीवरून उंचीवर असलेल्या डब्यात प्रवेश करण्यासाठी कसरत करावी लागते. अशावेळी महिला, लहान मुले आणि वृद्ध तसेच रुग्णांची अधिकच गैरसोय होते. फलाट तर नाहीच. पण छतही उभारलेले नाही. या समस्यांविषयी लोकप्रतिनिधी का गप्प आहेत, असा सवालही प्रवाशांकडून केला जात आहे.