Railway New Rule : तुम्ही जर रेल्वेनं प्रवास करत असाल तर तुमच्यासाठी महत्त्वाची अपडेट आहे. रेल्वे प्रवास सुधारण्यासाठी एक महत्त्वपूर्ण पाऊल उचलत, भारतीय रेल्वे प्रवाशांच्या तिकीट बुक करण्याच्या पद्धतीत मोठे बदल करण्याची तयारी करत आहे. या अपडेट्समध्ये प्रतीक्षा यादीतील तिकिटांसाठी लवकर चार्ट तयार करणे, तत्काळ बुकिंगसाठी कडक पडताळणी आणि प्रवासी आरक्षण प्रणाली (PRS)मध्ये संपूर्ण सुधारणा समाविष्ट आहेत. रेल्वे मंत्री अश्विनी वैष्णव यांनी म्हटले आहे की, रेल्वे प्रवास सुरळीत करण्यासाठी “स्पष्ट, अनुकूल आणि उत्पादक” अशी प्रणाली तयार करण्यावर लक्ष केंद्रित केले जात आहे.
१ जुलैपासून रेल्वे भाडे वाढणार
भारतीय रेल्वे १ जुलैपासून प्रवासी भाड्यात किरकोळ वाढ करणार आहे. रेल्वे प्रवाशांसाठी भारतीय रेल्वेकडून बदल करण्यात येत आहेत. १ जुलै २०२५ पासून हे बदल होणार आहेत. यातील एक रेल्वेकडून तात्काळ तिकिटांच्या नियमात बदल करण्यात आले आहेत. या अंतर्गंत आता १ जुलैपासून आधार व्हेरिफाइड युजर्सही आयआरसीटीसी वेबसाइट किंवा ॲपवर तत्काळ तिकीट बुक करू शकणार आहेत. या बदलाबरोबर रेल्वे १ जुलैपासून रेल्वेच्या तिकीट दरात वाढ करू शकतात. नॉनएसी मेल, एक्स्प्रेस ट्रेनच्या तिकिटात १ पैसे प्रति किमी आहेत. तर एसी क्लासमध्ये २ पैसे प्रति किमी वाढ करण्यात येऊ शकते. ५०० किमीपर्यंतच्या प्रवासासाठीच ही दरवाढ असणार आहे.
रिझर्व्हेशन चार्टमध्ये मोठे फेरबदल
सध्या ट्रेन सुटण्याच्या चार तास आधी आरक्षण चार्ट तयार केले जातात, यामुळे अनेकदा प्रतीक्षा यादीतील प्रवाशांना पर्यायी प्रवासाचे नियोजन करण्यासाठी खूप कमी वेळ मिळतो. ही समस्या सोडवण्यासाठी, रेल्वे सुटण्याच्या आठ तास आधी हा चार्ट तयार करण्यास सुरुवात करेल.
दुपारी २ वाजण्यापूर्वी सुटणाऱ्या गाड्यांसाठी, चार्ट आदल्या दिवशी रात्री ९ वाजेपर्यंत अंतिम केला जाईल. या बदलामुळे प्रवाशांना त्यांच्या तिकिटाच्या स्थितीबद्दल लवकर स्पष्टता मिळेल आणि त्यानुसार नियोजन करता येईल.
१ जुलै २०२५ पासून तत्काळ बुकिंगसाठी आधार
१ जुलै २०२५ पासून रेल्वे तत्काळ तिकिट बुकिंगसाठी ओटीपी-आधारित पडताळणीदेखील सुरू करेल.
वापरकर्त्यांना त्यांच्या डिजीलॉकर खात्यांमध्ये सेव्ह केलेल्या आधार किंवा इतर वैध कागदपत्रांचा वापर करून त्यांची ओळख पडताळणी करावी लागेल. हा बदल गैरवापर कमी करण्यासाठी आणि प्रवाशांना खऱ्या अर्थाने प्रवेश मिळावा यासाठी आहे. यापूर्वी केवळ आधार-प्रमाणित वापरकर्तेच तत्काळ तिकिटे बुक करू शकतील अशी घोषणा करण्यात आली होती. आता डिजीलॉकरद्वारे इतर सरकारी कागदपत्रेदेखील स्वीकारण्यासाठी नियमांचा विस्तार करण्यात आला आहे.
डिसेंबर २०२५ पर्यंत नवीन प्रवासी आरक्षण प्रणाली
प्रवासी आरक्षण प्रणालीमध्ये सध्या एक मोठे अपग्रेडेशन सुरू आहे. मध्य रेल्वे माहिती प्रणाली (CRIS) हे अपग्रेड करत आहे, जे डिसेंबर २०२५ पर्यंत पूर्ण होण्याची अपेक्षा आहे.नवीन प्रणाली सध्यापेक्षा दहापट जास्त बुकिंग हाताळण्यास सक्षम असेल. सध्याच्या ३२,००० च्या तुलनेत ती प्रति मिनिट १५०,००० पेक्षा जास्त तिकिट आरक्षणांना समर्थन देईल.
