IPL 2026: एमएस धोनी IPL खेळणार का? CSK च्या सीईओंनी सांगितला पुढील हंगामाचा प्लॅन; म्हणाले…

धोनीने आयपीएलचा आणखी एक हंगाम खेळावं अशी क्रिकेट चाहत्यांची मनापासून इच्छा होती. क्रिकबजने दिलेल्या वृत्तानुसार, चेन्नई सुपर किंग्ज संघाचे सीईओ काशी विश्वनाथन यांनी दिलेल्या माहितीनुसार, धोनीने स्वतः आयपीएलच्या आगामी हंगामात खेळणार असल्याची माहिती दिली आहे. आयपीएल २०२६ स्पर्धेपूर्वी देखील एमएस धोनीच्या निवृत्तीची चर्चा रंगली होती. पण आता काशी विश्वनाथन यांनी या चर्चांना पूर्णविराम दिला आहे.

आगामी हंगाम हे धोनीचे शेवटचे आयपीएल हंगाम असू शकते. कारण धोनीने आंतरराष्ट्रीय क्रिकेटमधून निवृत्ती घेऊन ५ वर्षे झाली आहेत. आंतरराष्ट्रीय क्रिकेटपासून दूर असताना, थेट आयपीएल स्पर्धा खेळण्यासाठी मैदानात उतरणं मुळीच सोपं नाही. फिटनेस आणि फॉर्मचा समतोल राखून ठेवणं कठीण होऊन जातं. गेल्या २ हंगामात तो फिटनेसच्या समस्येने त्रस्त दिसला. त्यामुळे आगामी हंगाम हे त्याच्या आयपीएल कारकिर्दीतील शेवटचे हंगाम असू शकते.

संजू सॅमसन चेन्नई सुपर किंग्जकडून खेळणार?

आगामी हंगामापूर्वी महत्वाचे निर्णय घेण्यासाठी येत्या १० किंवा ११ नोव्हेंबरला महत्वाची बैठक होऊ शकते. या बैठकीत एमएस धोनी, काशी विश्वनाथन आणि कर्णधार ऋतुराज गायकवाड आणि स्टीफन फ्लेमिंग उपस्थित राहू शकतात. या बैठकीत संजू सॅमसन ट्रेड करण्याबाबतचा निर्णय घेतला जाऊ शकतो. राजस्थान रॉयल्स आणि चेन्नई सुपर किंग्ज या दोन्ही संघांमध्ये संजू सॅमसनबाबत निर्णय घेतला जाऊ शकतो.