सांगली : आटपाडी कृषी उत्पन्न बाजार समितीने मागील दोन वर्षांच्या काळात शेतकरी, व्यापारी वर्गासाठी केलेल्या विविध सेवा सुविधा आणि पारदर्शक कामाच्या जोरावर कोल्हापूर विभागात प्रथम तर राज्यात २२ वा क्रमांक पटकावत ऐतिहासिक कामगिरी केली आहे.
बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्प अंमलबजावणी कक्ष पुणे पणन संचालनालय यांच्या कार्यालयाकडून राज्यातील बाजार समित्यांची सन २०२३-२४ वार्षिक क्रमवारी जाहीर केली आहे. या यादीत कोल्हापूर विभागात आटपाडी बाजार समितीने प्रथम क्रमांक तर राज्यात २२ वा क्रमांक पटकावला आहे.याबाबत सभापती संतोष पुजारी यांनी पत्रकार परिषदेत ही माहिती दिली. यावेळी उपसभापती सुनील सरक, माजी उपसभापती राहुल गायकवाड, संचालक विठ्ठल गवळी, सुनील तळे, शरद काळेल, कुमार भिंगे, सचिव शशिकांत जाधव उपस्थित होते.
सभापती पुजारी म्हणाले, पारदर्शक कामाच्या जोरावर आणि सर्व संचालक, सचिव शशिकांत जाधव यांच्या सहकार्याने हे यश मिळाले आहे. आता आम्ही राज्यात अव्वल ठरण्याचा प्रयत्न करू. आटपाडी व दिघंची येथे वे-ब्रीज, दिघंची येथे एक हजार टन क्षमतेचे गोदाम, स्वच्छता गृह, उपबाजार निर्मिती, शेतकरी भवन आणि अन्य आवश्यक सुविधा शेतकरी व व्यापारी वर्गासाठी उपलब्ध करून देण्याचा आमचा प्रयत्न आहे.माजी उपसभापती गायकवाड म्हणाले, कोल्हापूर विभागामध्ये सातारा, सांगली व कोल्हापूर जिल्हातील एकूण २१ बाजार समित्यांचा समावेश असून त्यामध्ये प्रथम क्रमांक मिळवला आहे. उत्पन्न मागील वर्षापेक्षा वाढले आहे.
आटपाडी बाजार समिती ‘अ’वर्गात आहे. बाजार आवारात शेळ्या-मेंढ्या बाजारात आणि डाळिंब सौदे बाजारात शेतकरी व्यापारी यांना पिण्याच्या पाण्याची मोफत व्यवस्था केलेली आहे. डाळिंब उत्पादक शेतकरी व व्यापाऱ्यांना डाळिंब वर्गीकरण, पॅकिंगसाठी दोन पॅक हाऊस सुरू केले आहेत. महिला व पुरुषांसाठी नवीन स्वच्छतागृह उभारले आहे.
