सांगली: जादा परताव्याचे आमिष दाखवून फसवणूक; ७ कोटी ८१ लाख गोठवले

हर्षवर्धन पाटील (रा. इस्लामपूर) यांनी २१ लाख १० हजाराची फसवणूक झाल्याची तक्रार केली होती. संशयितांनी कॅपिटलिक्स ऑनलाईन टेलीग्राम ग्रुपवरुन संवाद साधून अधिक फायद्याचे आमिष दाखवून गुंतवणूक करण्यास सांगितले. यासाठी बॅंक खाते नंबर देण्यात आला. परताव्यासाठी करापोटी आणखी पैसे जमा करण्यासाठी वेगवेगळे खाते नंबर चॅटिंगद्वारे देण्यात आले.

या प्रकरणी तक्रार दाखल होताच उप विभागीय पोलीस अधिकारी मंगेश चव्हाण, इस्लामपूर व सायबर पोलीस यांनी संयुक्त तपास केला. यावेळी धक्कादायक माहिती समोर आली. विविध बॅंकेत २७ बनावट खाती काढून फसवणुकीचा फंडा वापरण्यात येत असल्याचे समोर आले. खाती ज्यांच्या नावे आहेत ते सामान्य लोक असून त्यांनाही या व्यवहाराची माहिती नाही. यामधील मुख्य टोळी अद्याप उघडकीस आलेली नसली तरी संशयास्पद २७ खात्यावर जमा असलेली ७ कोटी ८१ लाखाची रक्कम गोठवण्यात आली आहे.