Islampur Assembly Constituency: जयंत पाटलांचा विजयीरथ रोखण्याची जबाबदारी निशिकांत पाटलांवर, ऐनवेळी कमळ सोडून हाती बांधले घड्याळ

राष्ट्रवादी काँग्रेस शरदचंद्र पवार पक्षाचे प्रदेशाध्यक्ष आमदार जयंत पाटील यांचा इस्लामपूरचा गड काबीज करण्यासाठी भाजपने मोर्चेबंधणी सुरू केली होती. परंतु, महायुतीच्या जागावाटपात इस्लामपूरची जागा राष्ट्रवादीच्या अजित पवार गटाला मिळणार, हे निश्चित होते. त्यामुळे सांगलीचे भाजपा जिल्हाध्यक्ष निशिकांत भोसले पाटील यांनी अजित पवार गटात प्रवेश केला. निशिकांत भोसले पाटील यांना अजित पवार गटाकडून उमेदवारी देण्यात आली आहे. इस्लामपूरमध्ये ऐन निवडणुकीच्या तोंडावर राष्ट्रवादीकडून (अजित पवार) भाजपाचा उमेदवार आयात करण्यात आला. गेली तीन दशके या मतदारसंघावर वर्चस्व राखणाऱ्या जयंत पाटील यांना नमवण्यासाठी पाटील विरोधकांची मोट बांधण्याचे मोठे आव्हान महायुतीसमोर आहे. वाळव्यासह शिराळा मतदारसंघात जयंत पाटील यांचे राजकीय वर्चस्व कायम राहिले आहे. या ताकदीवरच त्यांनी सांगली जिल्ह्याचे नेतृत्व मिळविण्याचा कायम प्रयत्न केला. सांगली महापालिकेतही सत्ताबदल घडवून आपली राजकीय ताकद निर्माण करण्याचा प्रयत्न केला. घरच्या मैदानात आपल्या विश्वासू शिलेदारांवर जबाबदारी सोपवून ते राज्य पातळीवर पक्षाची प्रदेशाध्यक्षांच्या भूमिकेतून बांधणी करत आहेत.

हेही वाचा : Election Commission : “हरियाणा निकालांवरुन तुम्ही आणि तुमच्या सहकाऱ्यांनी..” निवडणूक आयोगाचं मल्लिकार्जुन खरगेंना उत्तर

२०१९ मध्ये झालेल्या विधानसभा निवडणुकीत इस्लामपूरची जागा युतीतील शिवसेनेच्या वाट्याला गेल्याने शिवसेनेने गौरव नायकवडी यांना उमेदवारी दिली तर निशिकांत भोसले-पाटील हे अपक्ष मैदानात उतरले. निशिकांत भोसले पाटील यांना या निवडणुकीत ४३ हजार ३९४, तर शिवसेनेच्यावतीने मैदानात उतरलेल्या नायकवडींना ३५ हजार ६६८ मते मिळाली होती. यावेळी जयंत पाटील १ लाख १५ हजार ५६३ मते घेऊन विजयी झाले. आमदार पाटील आणि विरोधी मतातील फरक ३२ हजार ३०७ मतांचा राहिला. त्यामुळे विरोधकांचे ऐक्य नसल्यास जयंत पाटील यांच्यासाठी आगामी विधानसभा निवडणूकही सोपी ठरण्याची शक्यता आहे.

हेही वाचा : हरियाणातील पराभवानंतर असदुद्दीन ओवेसींची काँग्रेसवर टीका; म्हणाले, “स्वतःच्या नाकर्तेपणामुळे…”

पुढचा आमदार भाजपाचाच – बावनकुळे

आगामी निवडणुकीसाठी आमदार म्हणून माजी नगराध्यक्ष निशीकांत पाटील यांनाच लोकांची पसंती असल्याचे प्रदेशाध्यक्ष चंद्रशेखर बावनकुळे यांनी जाहीर सभेत बोलताना सांगितले. त्यामुळे महायुतीकडून सांगली जिल्हा भाजपाचे अध्यक्ष निशीकांत भोसले पाटील यांना उमेदवारी मिळावी यासाठी भाजपाकडून प्रयत्न करण्यात येत होते. अखेर राष्ट्रवादी काँग्रेस पक्षाकडून भाजपाने उमेदवार रिंगणात उतरवला, अशी चर्चा इस्लामपूरच्या राजकीय वर्तुळात आहे.