'बाहुबली' चित्रपटात भल्लालदेवची भूमिका साकारणाऱ्या राणा डग्गुबतीला खऱ्या आयुष्यात 'देवसेना' भेटली आहे. लॉकडाउनमध्येच राणाने मिहिका बजाज हिच्याशी साखरपुडा केला. हैदराबादमध्ये हा साखरपुडा पार पडला असून याला निवडक लोक उपस्थित होते. काही दिवसांपूर्वीच राणाने मिहिकासोबतचा फोटो पोस्ट करत तिच्यासोबत लग्न करणार असल्याची घोषणा केली होती. सध्या त्याच्या साखरपुड्याचे फोटो सोशल मीडियावर तुफान व्हायरल होत आहेत. साखरपुड्याला राणाने पांढरा शर्ट आणि मुंडू परिधान केला होता. तर मिहिकासुद्धा पारंपरिक वेशभूषेत पाहायला मिळाली. राणाचे वडील सुरेश बाबू यांनी नुकत्याच दिलेल्या एका मुलाखतीत सांगितलं की, राणाचं लग्न हिवाळ्यात करण्यात येणार आहे. या लग्नाची तयारीसुद्धा करण्यात आल्याची माहिती त्यांनी दिली. #RanaDaggubati #miheekabajaj pic.twitter.com/xRlx7cqxG3 — Suresh Productions (@SureshProdns) May 21, 2020 कोण आहे मिहिका बजाज? मिहीका बजाजची आई बंटी बजाज या दागिन्यांच्या व्यवसायातील प्रतिष्ठित व्यक्ती आहेत. त्या भारतातील प्रसिद्ध वेडिंग डेकॉर प्लॅनरसुद्धा होत्या. मिहीकाने इंटेरिअर डिझायनिंगचं शिक्षण घेतलं आहे. त्यानंतर ती लंडनला उच्च शिक्षणासाठी गेली. तिने मुंबईत इंटर्न डिझायनर म्हणूनही एक वर्ष काम केलं. २०१७ मध्ये मिहीकाने स्वत:ची इव्हेंट मॅनेजमेंट कंपनी स्थापित केली. 'ड्यू ड्रॉप डिझाइन स्टुडिओ' असं तिच्या कंपनीचं नाव आहे. कामानिमित्त मिहीका सतत हैदराबाद व मुंबई या शहरांमध्ये प्रवास करते. या दोन्ही शहरांबद्दल तिला विशेष प्रेम आहे.