अभिनेत्री सुप्रिया पाठारे या मराठी मनोरंजन सृष्टीतील लोकप्रिय अभिनेत्री आहेत. तर त्यांचा मुलगा मिहिर पाठारे हा प्रोफेशनल शेफ आहे. परदेशात प्रसिद्ध असणारी फूड ट्रकची संकल्पना त्याने ठाण्यात सुरू केली. तिथे यश मिळवल्यानंतर काही दिवसांपूर्वीच त्याने ठाण्यात स्वतःच नवीन हॉटेल सुरू केलं. सुप्रिया पठारेंचे मनोरंजनसृष्टीतील मित्र मंडळीही अनेकदा या हॉटेलमध्ये भेट देत असतात. तर ‘ठिपक्यांची रांगोळी’ फेम ज्ञानदा रामतीर्थिकर हिने हॉटेलमधील महत्वाची जबाबदारी सांभाळली.
सुप्रिया पाठारे गेले अनेक महिने आपल्याला ठिपक्यांची रांगोळी या मालिकेतून भेटायला येत आहेत. या मालिकेतील सर्व कलाकारांचं ऑफ स्क्रीन बॉण्डिंगही नेहमीच चर्चेत असतं. ते आता एकमेकांच्या कुटुंबाचाच भाग झाले आहेत. त्याच हक्काने या मालिकेत प्रमुख भूमिका साकारणारी अभिनेत्री ज्ञानदा रामतीर्थिकर हिने सुप्रिया पाठारे यांच्या मुलाच्या ‘महाराज’ हॉटेलच्या कॅश काऊंटरची जबाबदारी सांभाळली असं सुप्रिया पाठारे यांनी सांगितलं आहे.
आणखी वाचा : ‘असं’ आहे सुप्रिया पाठारे यांच्या लेकाने ठाण्यात सुरू केलेलं नवीन हॉटेल, पाहा खास झलक
या हॉटेलला खूप चांगला प्रतिसाद मिळत आहे. नुकत्याच दिलेल्या एका मुलाखतीमध्ये ज्ञानदा म्हणाली, “महाराज हॉटेल हा आमचा एक अड्डा झालेला आहे. आम्हाला तिथले सगळे पदार्थ खूप आवडतात आणि आम्ही अनेकदा त्या हॉटेलमध्ये येतो. बऱ्याच वेळा सुप्रियाताईही आम्हाला तिथे भेटते.” तर पुढे सुप्रिया पाठारे यांनी सांगितलं, ” मालिकेतील आमच्या सर्व कलाकारांचं बॉण्डिंग इतकं छान झालं आहे की एकदा ज्ञानदा हॉटेलमध्ये आली होती आणि तेव्हा खूप गर्दी होती. तिने मला धावपळ करताना पाहिलं आणि मला म्हणाली, ताई तू किती काम करतेस! दमली असशील. असं म्हणत त्यादिवशी तिने हॉटेलचं कॅश काउंटर सांभाळलं.”
तर आता सुप्रिया पाठारे यांचं हे बोलणं खूप चर्चेत आलं आहे. याचबरोबर त्यांचे चाहते त्यांच्या आणि ज्ञानदाच्या केमिस्ट्रीचही कौतुक करत आहेत.
