Mumbai Breaking News Updates : मुंबई, पुणे, नागपूर जिल्ह्यातील ताज्या घडामोडी एका क्लिकवर जाणून घ्या

कोल्हापूर : छत्रपती संभाजी महाराजांची जयंती कोल्हापूरसह जिल्ह्यात उत्साही वातावरणात साजरी करण्यात आली. या निमित्ताने जन्मकाळ सोहळा, रक्तदान शिबिर, व्याख्याने, पोवाडे, मिरवणुका आदी उपक्रमांचे आयोजन करण्यात आले होते.

बाबा जरगनगरमधील संयुक्त धर्मवीर संभाजी महाराज उत्सव समितीच्या वतीने जन्मकाळ सोहळा, चित्रकला स्पर्धा, अन्न महोत्सव, होम मिनिस्टर, हलगी वादन स्पर्धा, मिरवणूक आदी भरगच्च उपक्रमांचे आयोजन करण्यात आले होते.

पापाची तिकटी येथील छत्रपती संभाजी महाराज स्मारक येथे महाराजांच्या पुतळ्याला दुग्ध व जल अभिषेक केला. जन्मकाळ सोहळा झाल्यावर रक्तदान शिबिराला चांगला प्रतिसाद मिळाला.

बिंदू चौकात संभाजी महाराज जयंती सोहळा धर्मवीर १४ मित्र मंडळाच्या वतीने साजरा करण्यात आला. महाराजांचा २१ फुटी फायबरचा पुतळा विराजमान करण्यात आला होता. महाराजांची शौर्य कथा सांगणारा चरित्रपट दाखवण्यात आला.