पिंपरी-चिंचवड शहराला रेडझोनमधून वगळण्यात आलं आहे. त्यानंतर शुक्रवारपासून शहरातील दुकान खुली करण्यात आली. परंतु, दोन महिन्यानंतर दुकानं उघडण्यात आल्याने अनेक ठिकाणी ग्राहकांची गर्दी पाहायला मिळाली. यावेळी फिजिकल डिस्टंसिंगचा फज्जा उडाला. रस्त्यांवर नागरिकांनी मोठ्या प्रमाणावर गर्दी केली आहे. शुक्रवारपासून सम-विषम तारखेनुसार शहरातील सर्व दुकाने उघडण्यात आली आहेत. पिंपरी-चिंचवड शहरातील पिंपरीत मोबाईल आणि इलेक्ट्रॉनिक वस्तूंचे मार्केट आहे. दोन महिन्यानंतर इथली दुकानं उघडल्याने त्याठिकाणी ग्राहकांनी गर्दी केल्याचे पाहायला मिळाले. दरम्यान, पिंपरी मार्केटमधील एकाच बाजूची दुकान उघडण्यात आली होती. दरम्यान, दुचाकीवरुन एकाच व्यक्तीला प्रवासाची मुभा असताना दोन व्यक्ती सर्रासपणे दुचाकीवरुन प्रवास करताना दिसत आहेत. त्यामुळे महापालिका आयुक्तांच्या आदेशाला अनेकांनी केराची टोपली दाखवली आहे. करोनापासून बचावासाठी दुकांनामध्ये वस्तू विकत घेताना सॅनिटायझर आणि मास्क बंधनकारक आहे मात्र, काही दुकानदारांनी या नियमाचेही उल्लंघन केल्याचे दिसून आले. गेल्या दोन महिन्यांपासून पिंपरी मार्केट बंद होते, त्यामुळे आणखी गर्दी वाढण्याची शक्यता असून दुकानदारांनी नियमांचे पालन न केल्यास दुकानदारांना कारवाईला सामोरं जावं लागू शकतं.
