भेंडी, गवार, फ्लाॅवर, कोबी, शेवग्याच्या दरात वाढ

श्री छत्रपती शिवाजी मार्केट यार्डातील घाऊक बाजारात रविवारी राज्य, तसेच परराज्यातून मिळून ८० ते ९० ट्रक फळभाज्यांची आवक झाली. कर्नाटक, गुजरातमधून मिळून ३ ते ४ टेम्पो कोबी, आंध्र प्रदेश, तामिळनाडूतून मिळून ३ ते ४ टेम्पो शेवगा, हिमाचल प्रदेशातून ३ टेम्पो मटार, कर्नाटकातून २ ते ३ टेम्पो घेवडा, आंध्र प्रदेश, कर्नाटकातून २ ते ३ टेम्पो तोतापुरी कैरी, गुजरात आणि मध्य प्रदेशातून ९ ते १० टेम्पो लसूण, इंदूर येथून ९ ते १० टेम्पो गाजर अशी आवक झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.

पुणे विभागातून सातारी आले ४०० ते ५०० गोणी, भेंडी ६ ते ७ टेम्पो, गवार ६ ते ७ टेम्पो, टोमॅटो ८ ते १० हजार पेटी, हिरवी मिरची ३ ते ४ टेम्पो, ढोबळी मिरची ७ ते ८ टेम्पो, काकडी ७ ते ८ टेम्पो, कोबी ५ ते ६ टेम्पो, फ्लाॅवर ८ ते १० टेम्पो, भुईमूग शेंग १०० ते १२५ गोणी, तांबडा भोपळा १० ते १२ टेम्पो, कांदा ७५ ते ८० ट्रक, तसेच इंदूर, आग्रा, स्थानिक भागातून ४० ते ४५ ट्रक बटाट्याची आवक झाली.

कोथिंबिर, चुका, चाकवत, पुदीना महाग

गेल्या आठवड्याच्या तुलनेत पालेभाज्यांची आवक कमी झाली. कोथिंबिर, चाकवत, पुदिना, चुका या पालेभाज्यांच्या दरात वाढ झाली. करडईच्या दरात घट झाली. मेथी, शेपू, कांदापात, अंबाडी, मुळे, राजगिरा, चवळई, पालकाचे दर स्थिर असल्याची माहिती तरकारी विभागातील व्यापाऱ्यांनी दिली. मार्केट यार्डातील तरकारी विभागात रविवारी कोथिंबिरीच्या दीड लाख जुडींची, तसेच मेथीच्या २० ते २५ हजार जुडींची आवक झाली. पालेेभाज्यांचे शेकड्यातील दर पुढीलप्रमाणे – कोथिंबीर – ८०० ते १५००, मेथी – ८०० ते १५००, शेपू – ८०० ते १५००, कांदापात – १००० ते १५००, चाकवत – ५०० ते ८००, करडई -३०० ते ७००, पुदिना – ८०० ते १०००, अंबाडी – ४०० ते ७००, मुळे – ८०० ते १५००, राजगिरा – ३०० ते ७००, चुका – ५०० ते १०००, चवळई – ३०० ते ७००, पालक -१५०० ते २०००

पपई, खरबूज, कलिंगडाच्या दरात वाढ

फळ बाजारात पपई, कलिंगड, खरबूज या फळांच्या दरात वाढ झाली आहे. पावसामुळे लिंबे, डाळिंबांची आवक वाढली आहे. पावसामुळे प्रतवारीवर परिणाण झाला आहे. घाऊक फळबाजारात मोसंबी १५ ते २० टन, संत्री १ ते दीड टन, डाळिंब ४० ते ४५ टन, पपई १५ ते २० टेम्पो, लिंबे एक ते दीड हजार गोणी, कलिंगड २ ते ३ टेम्पो, खरबूज २ ते ३ टेम्पो, चिकू १०० खोकी, पेरू ३०० ते ४०० प्लास्टिक जाळी (क्रेट्स), सीताफळ एक टन, तसेच केरळहून ५ ट्रक अननस, जांभूळ १५ ते २० टेम्पो अशी आवक झाली.