पुणे : ‘सरकार आणि सुरक्षा दलांच्या मोहिमांमुळे नक्षलवादी संपतील. पण, नक्षलवादाचे काय?,’ असा सवाल उपस्थित करत नक्षलवाद संपविण्यासाठी आपल्यालाच काम करावे लागेल’, असे मत छत्तीसगड येथील आदिवासीबहुल बस्तर भागात कार्य करणाऱ्या सुनीता गोडबोले यांनी व्यक्त केले.
सरस्वती मंदिर संस्थेच्या १०५ व्या वर्धापनदिनानिमित्त आयोजित कार्यक्रमात राष्ट्रीय स्वयंसेवक संघाचे पश्चिम महाराष्ट्र प्रांत कार्यकारिणी सदस्य दिलीप क्षीरसागर यांच्या हस्ते सुनीता रामचंद्र गोडबोले यांना सेवाव्रती जीवनगौरव पुरस्कार’ प्रदान करण्यात आला. त्याप्रसंगी गोडबोले बोलत होत्या. सरस्वती मंदिर संस्थेचे अध्यक्ष विनायक आंबेकर, सचिव अविनाश नाईक, सहसचिव सुधीर चौधरी, रवींद्र जोशी, शैलेंद्र बोरकर आणि अनिल शिदोरे या वेळी उपस्थित होते.
गोडबोले म्हणाल्या, ‘स्वतःच्या अस्तित्वाचीही जाणीव नसलेल्या आदिवासी समाजात सर्वच क्षेत्रांत खूप समस्या आहेत. अतिडाव्या नक्षली चळवळींमुळे सर्वच क्षेत्रांत पिछेहाट झाली आहे. २००२ च्या ‘सलवा जुडूम’ नंतर सर्वत्र पडझडीची स्थिती आहे. आदिवासी समाजाचे दुःख बाजूला ठेवून शिक्षण, आरोग्य, कुपोषण क्षेत्रांत कार्य करावे लागेल.’ आदिवासी भागातील सेवाकार्यासाठी समाजातील सर्व स्तरांतील तरुणांनी सहभाग वाढवावा, असे आवाहनही त्यांनी केले.
क्षीरसागर म्हणाले, ‘राष्ट्राला आपोआप परमवैभव प्राप्त होणार नाही. त्यासाठी सेवाकार्य ही पूर्वअट आहे. अशा सेवाकार्यांतूनच समरस समाज उभा राहील. अभावग्रस्त समाजात कर्तव्याचे भान देण्याचे काम असे पुरस्कार करतात. संस्थेने सामाजिक उत्तरदायित्व म्हणून अशा पुरस्कारांची योजना केली हे कौतुकास्पद आहे. अशा सेवाव्रती पुरस्कारांमुळे समाजाला सेवेची प्रेरणा मिळते.
उच्च शिक्षणानंतरही दुर्गम आदिवासी भागात कार्य करणाऱ्या सुनीताताईंनी सर्वांसमोर एक आदर्श ठेवला आहे. करुणा, कर्तव्यभावना आणि समरसतेच्या भावनेतूनच अशा उपेक्षित, वंचित व मागास बांधवांसाठी कार्य करण्याची प्रेरणा मिळते. संस्कार, आरोग्य, शिक्षण, स्वावलंबन व संघटन या माध्यमातून उर्वरित समाजाशी समरस होण्यासाठी सुनीताताई कार्यरत आहेत.”
अनिल शिदोरे यांनी स्वागत केले. प्रतिमा काळे यांनी सरस्वती वंदना सादर केली. विनायक आंबेकर यांनी प्रास्ताविक केले. अविनाश नाईक यांनी आभार मानले.
कोण आहेत सुनीता गोडबोले
अखिल भारतीय विद्यार्थी परिषदेच्या कार्याशी जोडलेल्या सुनीता गोडबोले यांनी आपले संपूर्ण आयुष्यच आदिवासी समाजाच्या सेवेसाठी वाहिले. लग्नानंतर गोडबोले दाम्पत्य १९९० मध्ये दंतेवाडा जिल्ह्यातील बारसूर परिसरात स्थायिक झाले. सध्या ते आरोग्य आणि बालकांच्या कुपोषण निवारणासाठी काम करत आहेत.
