पुणे : तळेगाव-चाकण-शिक्रापूर मार्गाची दुरुस्ती आणि रस्तारुंदीकरणासाठी ५९.७५ कोटींच्या निधीला राज्य शासनाने मंजुरी दिली आहे. दुरुस्ती आणि रस्ता रूंदीकरणाच्या कामांनंतर मार्गावरील वाहतूक कोंडी कमी होईल आणि अपघातांचा धोकाही टाळून औद्योगिक क्षेत्राला दिलासा मिळण्याची शक्यता आहे.
तळेगांव-चाकण-शिक्रापूर या मार्गात तळेगांव ते चाकण दरम्यान चार पदरी उन्नत मार्ग आणि जमिनीस समांतर चार पदरी रस्ता तसेच चाकण ते शिक्रापूर दरम्यान सहा पदरी रस्ता या कामाचा समावेश आहे. हे संपूर्ण काम बांधा, वापरा आणि हस्तांतरित करा (बी.ओ.टी.) तत्वावर बांधण्यात येणार आहे.
या मार्गाचा समावेश पूर्वी राज्य रस्ते विकास आराखडा २००१-२०२१ अंतर्गत करण्यात आला होता. त्यानंतर केंद्र सरकारच्या रस्ते वाहतूक आणि महामार्ग मंत्रालयाने या रस्त्याला राष्ट्रीय महामार्ग ५४८ डी असा दर्जा दिला असून, राष्ट्रीय महामार्ग प्राधिकरणाकडून तो महाराष्ट्र राज्य पायाभूत विकास महामंडळाकडे (एमएसआयडीसी) हस्तांतरित करण्यात आला आहे.
सद्य:स्थितीत तळेगाव-चाकण-शिक्रापूर हा महामार्ग अतिवृष्टीमुळे खचला असून, रस्त्याची मोठ्या प्रमाणात दुरुस्ती आणि रुंदीकरण आवश्यक झाले आहे. हा मार्ग औद्योगिक दृष्ट्या महत्त्वाचा असल्यामुळे येथे आवजड वाहतुकीची मोठी वर्दळ असते. परिणामी, वाहतूक कोंडी, अपघातांचा धोका आणि रस्ता सुरक्षेच्या समस्या निर्माण झाल्या होत्या. हा महामार्ग परिसरातील मुख्य रस्त्यांना जोडणारा एकमेव महत्त्वाचा रस्ता असल्याने स्थानिक लोकप्रतिनिधींकडून सातत्याने दुरुस्तीची मागणी होत होती.
यासंदर्भात पुणे जिल्ह्यातील लोकप्रतिनिधी आणि संबंधित विभागीय अधिकाऱ्यांची जुलै महिन्यात बैठक झाली होती. या बैठकीत रस्त्याच्या दुरुस्ती आणि रुंदीकरणासाठी तातडीने प्रस्ताव सादर करण्याच्या सूचना देण्यात आल्या होत्या. त्यानुसार शासनस्तरावर पाठपुरावा करून आता आवश्यक निधीस मान्यता देण्यात आली आहे.
तळेगाव-चाकण-शिक्रापूर मार्गाची दुरुस्ती आणि रुंदीकरणासाठी ५९.७५ कोटींचा निधी मंजूर करण्यात आला आहे. या कामांनंतर मार्गावरील वाहतूक कोंडी कमी होऊन औद्योगिक क्षेत्राला दिलासा मिळेल. – शिवेंद्रसिंहराजे भोसले, मंत्री, सार्वजनिक बांधकाम विभाग.
