Pahalgam Attack Updates : पंतप्रधान मोदींची कतारचे अमीर शेख तमीम बिन हमद अल थानी यांच्याशी चर्चा

गुप्तचर यंत्रणांनी तीन दिवस आधीच हल्ला होईल अशी कल्पना दिली होती, मोदींना अहवाल दिला होता. त्यामुळेच पंतप्रधान नरेंद्र मोदींनी काश्मीर दौरा रद्द केला होता. गुप्तचर यंत्रणांनी जर तुमच्या रक्षणासाठी हे सांगत असतील की तुम्ही काश्मीरला जाऊ नका. तर मग तुम्ही हीच बाब काश्मीर पोलीस, सीमा सुरक्षा दल या सगळ्यांना तुम्ही त्याची माहिती का दिली नाही हा माझा सवाल आहे असं मल्लिकार्जुन खरगेंनी म्हटलं आहे.

भारतातल्या एकूण २५९ ठिकाणी ७ मे रोजी युद्ध सराव अर्थात मॉक ड्रील केलं जाईल. १९७१ नंतर पहिल्यांदाच देशभरात अशा प्रकारचं मॉक ड्रील केलं जातं आहे. महाराष्ट्रात मुंबई, ठाणे, पुणे, पिंपरी-चिंचवड, उरण, तारापूर, थळ, सिन्नर, मनमाड, नाशिक, रोहा, नागोठणे अशा १६ ठिकाणी मॉक ड्रील पार पडणार आहे.

७ मे रोजी युद्ध सराव केला जाणार आहे त्याबाबत संजय राऊत म्हणाले की युद्ध सराव अनेक देशांमध्ये होत असतो. इस्रायलसारख्या देशांना सातत्याने युद्ध सराव करावा लागतो कारण तिथे वर्षानुवर्षे युद्धस्थिती आहे. युक्रेनचीही तशीच परिस्थिती आहे. १९७१ मध्ये बांगलादेशच्या युद्धाची परिस्थितीही आम्ही पाहिली आहे. भारत पाकिस्तान युद्धापेक्षा मोठं युद्ध आपण लढलो ते म्हणजे करोनाचं युद्ध. भारताची जनता मानसिक दृष्ट्या मजबूत आहे. या सगळ्या गोष्टींमध्ये तुम्ही (केंद्र सरकारने) जनतेला मानसिकदृष्ट्या अडकवून ठेवत आहात. खरंतर एखादी घटना घडल्यानंतर २४ तासांत उत्तर दिलं पाहिजे. आता आमचा युद्ध सराव होईल म्हणजे काय बंदुका वगैरे देणार का? भोंगे वाजणार, काळोख होईल, महत्त्वाच्या वास्तू झाकणे हे सगळं आम्ही १९७१ ला पाहिलं आहे. याची माहिती दिली जाऊ शकते. थाळ्या वाजवल्या, टाळ्या वाजवल्या तसं युद्ध सरावात काही दिवस घालवतील. सैन्य हे कायम सज्ज असलं पाहिजे, ते आहेच. असं राऊत यांनी म्हटलं आहे.

७ मे रोजी केंद्रीय गृहमंत्रालयाने मॉक ड्रील अर्थात युद्ध सराव करण्याचे आदेश दिले आहेत. त्यामुळे पाकिस्तानची झोप उडाली आहे. भारत कधीही एलओसीवर मिलिट्री स्ट्राईक करु शकतो असं पाकिस्तानचे संरक्षण मंत्री ख्वाजा आसिफ यांनी म्हटलं आहे. इस्लामाबादमध्ये माध्यमांशी बोलत असताना त्यांनी हे वक्तव्य केलं आहे.