यजमान हेर्था संघाने ७४ हजार प्रेक्षक क्षमतेच्या रिकाम्या स्टेडियममध्ये आपल्या कामगिरीचा सर्वोत्तम नजराणा पेश करत युनियन बर्लिनवर ४-० असा दणदणीत विजय मिळवला. या विजयामुळे हेर्थाने बुंडेसलीगा फुटबॉलच्या गुणतालिकेत १०व्या स्थानी झेप घेतली आहे. दुसऱ्या सत्रात वेदाद इबिसेव्हिक, दोडी लुकेबाकियो, मथेअस कुन्हा आणि डेरिक बोयाटा यांनी गोल करत हेर्थाला मोठा विजय मिळवून दिला. ‘‘प्रेक्षकांच्या साक्षीने आम्ही ही कामगिरी साकारली असती तर अधिक आनंद झाला असता. मात्र आमच्या चाहत्यांना आनंद देऊ शकलो, याचेच समाधान अधिक वाटत आहे,’’ असे हेर्थाचे प्रशिक्षक ब्रुनो लब्बाडिया यांनी विजयानंतर सांगितले.
