MS Dhoni salary will be reduced by three times for IPL 2025 : आयपीएल २०२५ पूर्वी खेळाडूंसाठीचे नियम आणि रिटेनशन स्कीम मजबूत करण्याच्या प्रक्रियेदरम्यान धोनीबाबत एक मोठी बातमी समोर आली आहे. असे मानले जाते की बीसीसीआय आयपीएल २०२५ च्या आधी खेळाडूंसाठी नियम जाहीर करताना महेंद्रसिंग धोनीला अनकॅप्ड खेळाडूंच्या श्रेणीत ठेवू शकते. अनकॅप्ड खेळाडूं कसा ठरवला जातो आणि त्याचे मानधन किती असते? याबद्दल जाणून घेऊया.
धोनीच्या मानधनात होणार मोठी कपात?
अद्याप कोणतीही पुष्टी झालेली नसली तरी वृत्तानुसार बीसीसीआय जुना नियम परत आणू शकते. या नियमानुसार एमएस धोनीला अनकॅप्ड खेळाडूंच्या यादीत ठेवले जाईल. यामुळे धोनी निश्चितपणे आयपीएल २०२५ मध्ये खेळताना दिसणार असल्याचेही स्पष्ट होईल. हा नियम याआधीही अस्तित्वात होता, पण तेव्हा तो वापरला गेला नाही. मात्र आता तो नियम परत आणण्याची चर्चा सुरू झाली आहे. कॅप्ड खेळाडू असताना, धोनीला सीएसकेकडून प्रत्येक मोसमात १२ कोटी रुपये मानधन मिळत होते, पण जर त्याला अनकॅप्ड खेळाडूंच्या यादीत ठेवले तर त्याचे मानधन ४ कोटी रुपयांपर्यंत कमी होऊ शकतो.
काय आहे अनकॅप्ड खेळाडूचा नियम?
वास्तविक, २००८ ते २०२१ दरम्यान, आयपीएलमध्ये असा नियम होता की ५ वर्षांपूर्वी आंतरराष्ट्रीय क्रिकेटमधून निवृत्ती घेतलेल्या क्रिकेटपटूला आयपीएल लिलावात अनकॅप्ड खेळाडूसह समाविष्ट केले जाऊ शकते. गेल्या महिन्यात ३१ तारखेला आयपीएल संघ मालक आणि आयपीएल प्रशासन यांच्यात झालेल्या बैठकीतही हा मुद्दा उपस्थित करण्यात आला होता. या बैठकीत रिटेनशनचा जुना नियम परत आणण्याची सूचना करण्यात आली, त्याला अनेक फ्रँचायझी मालकांनी विरोध केला होता. मात्र, आता टाईम्स ऑफ इंडियाच्या माहितीनुसार, सीएसके व्यवस्थापनाला दिलासा मिळू शकतो.
सीएसकेचे सीईओ कासी विश्वनाथन काय म्हणाले?
जर बीसीसीआयने अनकॅप्ड खेळाडूचा जुना नियम लागू केल्यास धोनीला रिटेन करणे सीएसकेसाठी फायदेशीर ठरेल. पूर्वीच्या रिटेन्शन नियमांनुसार, अनकॅप्ड खेळाडूला ४ कोटी रुपयांमध्ये रिटेन करता येऊ शकते. सीएसकेने आयपीएल २०२२ च्या आधी झालेल्या मेगा लिलावात धोनीला रिटेन करण्यासाठी १२ कोटी रुपये खर्च केले होते. २०२५ च्या आयपीएल लिलावात धोनीला अनकॅप्ड खेळाडू म्हणून गणले जाईल का असे विचारले असता, सीएसकेचे सीईओ कासी विश्वनाथन यांनी टाइम्स ऑफ इंडियाला सांगितले की त्यांना याबद्दल कोणतीही माहिती नाही. याबाबत त्यांनी कोणतीही विनंती केलेली नाही. बीसीसीआयने त्याला सांगितले आहे की ‘अनकॅप्ड प्लेयर रूल’ ठेवता येईल.
आयपीएल २०२४ मध्ये हे स्पष्टपणे दिसले की धोनीला गुडघ्याची समस्या आहे, तरीही तो संपूर्ण हंगाम खेळत राहिला. पण या दुखापतीमुळे तो अनेकदा सातव्या किंवा खालच्या फळीत फलंदाजी करताना दिसला. त्या दुखापतीमुळे धोनी आयपीएलमधूनही निवृत्ती घेऊ शकतो, असे प्रश्न उपस्थित केले जात होते, परंतु अधिकृत दुजोरा न मिळाल्याने धोनीला खेळताना पाहण्याच्या चाहत्यांच्या आशा कायम आहेत.
