बॉलिवूडमध्ये अनेकांसाठी 'गॉडफादर' ठरलेल्या अभिनेता सलमान खानने त्याच्या मेहुण्यालाही चित्रपटात लाँच केलं. मेहुणा आयुष शर्माने 'लवयात्री' या चित्रपटातून बॉलिवूडमध्ये पदार्पण केलं आणि त्याची जबाबदारी 'भाईजान' अर्थात सलमानने आपल्या खांद्यावर घेतली होती. पण आयुषचा हा चित्रपट बॉक्स ऑफीसवर दणक्यात आपटला. तरीसुद्धा या अपयशाने न खचता आता आयुषने जबरदस्त पुनरागमन करण्याची तयारी केली आहे. सलमानच्या पावलावर पाऊल टाकत आयुष आता एका अॅक्शनपटात मुख्य भूमिका साकारणार असल्याची माहिती समोर येत आहे. 'डीएनए' या वृत्तपत्राने दिलेल्या माहितीनुसार आयुषच्या या दुसऱ्या चित्रपटाच्या निर्मितीचीही जबाबदारी सलमानच घेणार आहे. आयुषचं अभिनय सलमानला आवडल्याने त्याला दुसरी संधी देण्याचा विचार त्याने केला आहे. म्हणूनच यावेळी रोमॅण्टिक नव्हे तर एका अॅक्शनपटातून तो आयुषला प्रेक्षकांच्या भेटीला आणणार आहे. सध्या या चित्रपटाच्या कथेवर सलमान आणि आयुष काम करत आहेत. वाचा : आमिरच्या 'ठग्स ऑफ हिंदोस्तान' मोडले हे सहा बॉक्स ऑफीस रेकॉर्ड पहिला प्रयोग फसल्यानंतर आता आयुषचा दुसरा चित्रपट आणि अॅक्शन अंदाज तरी प्रेक्षकांना भावतो का हे पाहणं औत्सुक्याचं ठरणार आहे. आयुष शर्मा हा सलमानची बहीण अर्पिता खान हिचा पती आहे. २०१४ मध्ये आयुष आणि अर्पिताचं लग्न झालं. दोघांना २ वर्षांचा एक मुलगा आहे.
