भारतीय कलाकार पाकिस्तानविरोधात का बोलत नाहीत? ‘गदर’चा दिग्दर्शक म्हणाला…

झी न्यूजला दिलेल्या मुलाखतीदरम्यान अनिल शर्मा यांना विचारण्यात आलं की बॉलीवूडला कशाची भीती आहे? भारतीय कलाकारांनी त्यांच्या पोस्टमध्ये पाकिस्तानचे नावच घेतले नाही. यावर गदरचे दिग्दर्शक म्हणाले, “ऑपरेशन सिंदूर झाले, त्याच दिवशी मी पोस्ट केली होती. कारण दहशतवाद हा वाईट आहे, देश कोणताही असतो. जो देश दहशतवादाला पाठिंबा देतो तो चांगला असू शकत नाही. त्या देशातील सामान्य नागरिक चांगले असतील, त्या देशाचे कलाकार तिथे राहत असल्याने ते भारताविरुद्ध ट्विट करत असतील. पण वाईट गोष्ट ही आहे की तुम्ही दहशतवादाला पाठिंबा देत आहात. तुम्ही दहशतवाद्यांच्या पाठीशी उभे आहात.”

अनिल शर्मा यांना विचारण्यात आलं की भारतीय कलाकारांना कशाची भीती वाटते? मार्केटिंगची भीती आहे का? की फॉलोअर्स गमावण्याची? यावर अनिल शर्मा म्हणाले, “मी काय उत्तर द्यावं? तुम्ही स्वतः या प्रश्नांची उत्तरं दिलीत. इंडस्ट्रीची विदेशात खूप मोठी बाजारपेठ आहे आणि त्यापैकी पाकिस्तानी प्रेक्षकांची संख्या खूप जास्त आहे. भारतीय कलाकारांचे पाकिस्तानी फॉलोअर्सही खूप जास्त आहेत. त्यामुळे प्रत्येकाला वाटतं की ही वेळ निघून जाईल. पण बोलल्यास मी माझे फॉलोअर्स गमावेन. माझं जग संपेल, माझ्याकडे ओव्हरसीज मार्केट राहणार नाही, असा विचार बरेच लोक करतात.”

भारतीय कलाकार दहशतवादाबद्दल बोलताना पाकिस्तानचं नाव का घेत नाहीत, याबद्दल दिग्दर्शक अनिल शर्मा यांनी त्यांचं मत मांडलं आहे.