मुंबई : दक्षिण मुंबईतील लायन गेट येथील पदपथावर बांधण्यात येत असलेले महागडे आकांक्षी शौचालय पुन्हा एकदा वादात सापडले आहे. या शौचालयाच्या बांधकामाला राज्य सरकारने पावसाळी अधिवेशनात स्थगिती दिली होती. तरीही या शौचालयाचे पुन्हा बांधकाम सुरू झाल्याचा आरोप भाजपच्या माजी नगरसेवकांनी केला असून पालिका प्रशासनावर आरोप केले आहे. मात्र मुंबई महापालिका प्रशासनाने हे आरोप फेटाळून लावले आहेत. तसेच शौचालयाचे बांधकाम स्थगितच असल्याचे स्पष्ट केले आहे.
लायन गेट, विधान भवन परिसर, फॅशन स्ट्रीट, बाणगंगा, गिरगाव दर्शक गॅलरी अशा पर्यटन स्थळांना भेट देणाऱ्या पर्यटकांच्या सोयीसाठी मुंबई महापालिकेने १४ वातानुकूलित प्रसाधनगृहे बांधण्याचे ठरवले आहे. मुंबई शहरातील पर्यटन स्थळांना भेटी देण्यासाठी देश विदेशातील पर्यटक येत असतात.
मात्र या पर्यटन स्थळांच्या ठिकाणी चांगल्या स्थितीतील शौचालयांची सुविधा नसल्याने पर्यटकांची विशेषतः महिलांना गैरसोयींना सामोरे जावे लागते. त्यामुळे माजी पालकमंत्री दीपक केसरकर यांनी पर्यटनस्थळी शौचालये बांधण्याची सूचना केली होती. त्यानुसार पालिका प्रशासनाने पर्यटनस्थळी सोयीसुविधांनी युक्त अशी वातानुकूलित प्रसाधनगृहे तयार करण्याचे ठरवले होते. मुंबईत १४ ठिकाणी अशी प्रसाधनगृहे सुरू केली जाणार असून त्यासाठी ३५ कोटी रुपये खर्च केले जाणार आहेत. या कामासाठी जिल्हा नियोजन समितीच्या निधीतून १२ कोटींचा निधीही उपलब्ध करून देण्यात आला होता. त्यापैकी लायन गेट येथील शौचालयावरून हा वाद सुरू झाला होता.
आकांक्षी शौचालये पदपथावर बांधण्यात येत असल्यामुळे पादचारी धोरणाचे उल्लंघन झाल्याचा आरोप भाजपचे माजी नगरसेवक मकरंद नार्वेकर यांनी केला होता. त्यानंतर विधानसभेतही हा मुद्दा उपस्थित करण्यात आला होता. आमदार अमित साटम यांनी हा मुद्दा उपस्थित केल्यावर मंत्री उदय सामंत यांनी या शौचालयांच्या बांधकामाची चौकशी करण्याचे आदेश दिले होते. तसेच ही चौकशी पूर्ण होईपर्यंत दक्षिण मुंबईतील १४ आकांक्षी शौचालयाची कामे स्थगित करण्याची घोषणा सामंत यांनी सभागृहात केली होती.
मात्र लायन गेट येथील शौचालयाचे काम पुन्हा सुरू झाले असल्याचा आरोप मकरंद नार्वेकर यांनी पालिका आयुक्त भूषण गगराणी यांना पत्र लिहून केला आहे. तसेच राज्य सरकारच्या आदेशाचे उल्लंघन करणाऱ्या अधिकाऱ्यांवर कठोर कारवाई करण्याची मागणी केली आहे.
दरम्यान, मुंबई महानगरपालिका प्रशासनाने हे आरोप फेटाळले आहेत. विधानसभा अध्यक्ष महोदय यांनी १७ जुलै २०२५ रोजी दिलेल्या निर्देशानुसार, लायन गेट येथील शौचालयाचे बांधकाम बंद ठेवण्यात आले असल्याचे स्पष्टीकरण पालिका प्रशासनाने दिले आहे. मात्र लायन गेट येथील प्रस्तावित आकांक्षी शौचालयाच्या ठिकाणालगतहून बेस्टच्या केबल जातात. या केबलमध्ये दोष निर्माण झाल्यामुळे गेल्या २-३ दिवसांपासून बेस्ट प्रशासनाकडून येथे केबल दुरुस्तीचे काम सुरु आहे. मुंबई महानगरपालिकेने याठिकाणी कोणतेही बांधकाम पुन्हा सुरू केलेले नाही, असे महानगरपालिका प्रशासनाने स्पष्ट केले आहे.
विरोध का?
पदपथावर बांधल्या जाणाऱ्या या शौचालयांमुळे पादचाऱ्यांच्या जागेवर अतिक्रमण होते आणि ‘पादचारी प्रथम’ या धोरणाचे उल्लंघन होत असल्याचा नार्वेकर यांचा आरोप आहे. या धोरणानुसार किमान १.२ मीटर रुंदीचा विना अडथळा मार्ग पादचाऱ्यांसाठी अनिवार्य आहे. मात्र लायन गेट शौचालयाबाबतीत पदपथ ८.६५ मीटर रुंद आहे, तरीही पादचाऱ्यांसाठी जागा सोडण्यात आलेली नाही. या शौचालयामुळे पादचाऱ्यांना रस्त्यावरून चालण्यास भाग पाडले जात आहे. त्यामुळे नागरिकांची सुरक्षा धोक्यात आहे, असा आरोप नार्वेकर यांनी केला आहे.
