Mumbai Maratha Reservation Protest Manoj Jarange : मुंबई : मुंबई महानगरपालिका व छत्रपती शिवाजी महाराज टर्मिनस समोरील रस्त्यावर सकाळीच मराठा आंदाेलक एकवटले आहेत. त्यामुळे या परिसरातून फोर्ट, गिरगाव, टपाल कार्यालय, मंत्रालय, जे.जे. उड्डाणपूल या परिसराकडे जाणाऱ्या रस्त्यांवरील वाहतूक पूर्णपणे ठप्प झाली आहे. मुंबई महानगरपालिकेच्या समोरील सर्व रस्त्यांवर गाड्यांच्या रांगा लागल्या आहेत. या परिसरात तीन रुग्णालये असल्याने तेथे जाणाऱ्या रुग्णवाहिकांना आंदोलकांकडून वाट करून दिली जात आहे.
आरक्षण घेतल्याशिवाय मुंबई सोडणार नाही, असा निर्धार करून मनोज जरांगे यांनी शुक्रवारी आझाद मैदानात आंदोलन पुकारले आहे. या आंदोलनासाठी राज्यभरातून मोठ्या प्रमाणात मराठा आंदोलक मुंबईत दाखल झाले आहेत.
सरकारकडून दुर्लक्ष करण्यात येत असल्याचा आरोप करून आंदोलकांनी आक्रमक पवित्रा घेतला आहे. त्यातच या परिसरातील हाॅटेल, टपरी बंद असल्याने आंदोलकांनी मुंबई महानगरपालिकेच्या रस्त्यावरच आंदोलकांनी शेगडी पेटवत नाष्टा व जेवण बनविण्यास सुरुवात केली. या परिसरात मराठा आंदोलक मोठ्या प्रमाणात जमा झाल्याने फोर्ट, गिरगाव, टपाल कार्यालय, मंत्रालय, जे. जे. उड्डाणपूल या दिशेने जाणारी व त्या दिशेने येणारी सर्व वाहतूक ठप्प झाली आहे. जे.जे. उड्डाणपुलाच्या दिशेने येणारी वाहतूक ही भायखळ्यापर्यंत पोहचली आहे. या मार्गावर अनेक ठिकाणी बेस्टच्या बस व अनेक गाड्या अडकल्या आहेत. त्यामुळे वरिष्ठ पोलीस अधिकाऱ्यांकडून रस्त्यावर आंदोलन करण्याऐवजी आझाद मैदानात आंदोलन करण्याचे, आवाहन केले जात आहे. मात्र आंदोलक हटण्यास तयार नसल्याने पोलिसांची अडचण होत आहे.
शनिवार असल्याने अनेक सरकारी कार्यालये बंद आहेत. सकाळच्या सुमारास कार्यालयात जाणाऱ्या कर्मचाऱ्यांना त्रास झाला नसला तरी खासगी कार्यालयांमध्ये जाणाऱ्या कर्मचाऱ्यांना या आंदोलनाचा फटका बसला आहे. अनेक नागरिकांना आंदोलकांच्या गर्दीतून वाट काढत कार्यालय गाठावे लागले तर अनेकांच्या गाड्या अडकल्याने त्यांना कार्यालयात जाण्यासाठी विलंब होण्याची शक्यता निर्माण झाली आहे.
शीघ्र कृती दल सज्ज
मराठा आंदोलकांनी आक्रमक पवित्रा घेतला असून त्यामुळे मुंबई महानगरपालिका व छत्रपती शिवाजी महाराज टर्मिनस परिसरात मोठ्या प्रमाणात आंदोलक जमा झाले आहेत. वाहतूक कोंडी सोडविण्यासाठी पोलिसांकडून प्रयत्न केले जात आहेत. मात्र आंदोलक ऐकत नसल्याने पोलिसांकडून शीघ्र कृती दलाच्या दोन तुकड्या सज्ज ठेवण्यात आल्या आहेत.
पूर्व मुक्त महामार्ग जाम
एक मराठा लाख मराठा अशा घोषणा देत मराठा आंदोलक आझाद मैदानाबाहेरील रस्त्यावर उतरल्याने या परिसरात वाहतूक कोंडी झाली आहे. त्याचा परिणाम पूर्व मुक्त महामार्गावरील वाहतूकीवरही झाला आहे. या मार्गावरून छत्रपती शिवाजी महाराज टर्मिनसच्या दिशेने येणाऱ्या गाड्या अडकल्या आहेत. त्यामुळे या मार्गावर गाड्यांची लांबच लांब रांग लागली आहे. पी.डीमेलो रोडपासून जवळपास डॉकयार्ड रोडपर्यंत या मार्गावर वाहतूक कोंडी झाली आहे. त्यामुळे या मार्गावरून कार्यालयात येणाऱ्या कर्मचाऱ्यांची अडचण झाली आहे.
