पुणे: गाणपत्य संप्रदायात कार्तिक शुद्ध चतुर्थी, श्री उमांगमलज जन्मोत्सवात मोरयाला नारळ समर्पित करण्याला विशेष महत्त्व आहे. हे औचित्य साधून श्रीमंत दगडूशेठ गणपती मंदिरात हा जन्मोत्सव सोहळा साजरा करीत गंरायल्स ११०० नारळांचा नैवेद्य गुरुवारी दाखविण्यात आला.
श्रीमंत दगडूशेठ हलवाई सार्वजनिक गणपती ट्रस्टतर्फे मंदिरात श्री उमांगमलज जन्मोत्सव सोहळ्याचे आयोजन करण्यात आले होते. गुरुवारी पहाटे तीन वाजता ब्रह्मणस्पती सूक्त, पहाटे चार वाजता गायिका सन्मिता धापटे-शिंदे यांच्या गायनाचा कार्यक्रम आणि सकाळी आठ वाजता गणेश याग झाला.
हेही वाचा… सावधान! पुण्यात आढळला झिकाचा पहिला रुग्ण
ट्रस्टचे अध्यक्ष माणिक चव्हाण म्हणाले, देवी पार्वतीने अंगावरच्या मळापासून एक पुतळा बनवला. त्याला जिवंत केले. पुढे त्याचे आणि शंकरांचे युद्ध झाले. भगवान शंकरांनी त्या मुलाचे मस्तक उडविले. देवी पार्वतीच्या संतापाला शांत करण्यासाठी शेवटी त्या बालकाच्या धडावर भगवान श्री विष्णूंनी आणलेले गज मस्तक बसविण्यात आले. त्यांना श्री गजानन असे म्हटले आहे. ही गणेश जन्माची कथा आपण नेहमी ऐकतो ती या अवताराची कथा आहे. या अवतारात भगवान श्री गणेशांचे नाव उमांगमलज आहे.
