पाकिस्तानमधून येणाऱ्या वाऱ्यांमुळे काश्मीरमध्ये बर्फ आणि महाराष्ट्रात थंडी

हेही वाचा- निजामाबाद-पुणे, दौंड-भुसावळ रेल्वे गाड्या उद्यापासून रद्द; पुणे-नागपूर गाड्या बदललेल्या मार्गाने

सध्या उत्तर-पश्चिम महाराष्ट्र, मराठवाडा आणि विदर्भातील रात्रीच्या किमान तापमानात सरासरीच्या तुलनेत मोठी घट कायम असल्याने या भागात थंडीचा कडाका आहे. कोकणातही अनेक भागांत तापमानात घट होत असल्याने गारवा निर्माण झाला आहे. हिमालयीन विभागात होणारी बर्फवृष्टी आणि त्यामुळे उत्तरेकडील राज्यांतून महाराष्ट्राकडे येणाऱ्या थंड वाऱ्यांच्या प्रवाहांमुळे गेल्या तीन-चार दिवसांपासून राज्याच्या तापमानात मोठी घट झाली. दोन दिवसांपासून तापमान झपाट्याने खाली गेले. ९ आणि १० जानेवारीला मध्य महाराष्ट्र आणि विदर्भात काही भागांत थंडीच्या लाटेची स्थिती होती. गोंदिया, नाशिक, औरंगाबाद, नागपूर आदी भागांत ५ ते ६ अंश हंगामातील नीचांकी किमान तापमानाची नोंद झाली. मध्य महाराष्ट्र, मराठवाडा आणि विदर्भात सर्वत्र किमान तापमान सरासरीच्या तुलनेत ५ ते ७ अंशांनी घटले होते. त्यामुळे कडाक्याची थंडी निर्माण झाली. सध्या उत्तरेकडील थंडीच्या लाटेची तीव्रता घटली आहे. त्यामुळे तापमानात काही प्रमाणात वाढ झाली असली, तरी गारठा कायम आहे.

हेही वाचा- दहावी-बारावी परीक्षेतील गैरप्रकार रोखण्यासाठी लोकसहभागातून कृती कार्यक्रम, राज्य मंडळातर्फे पहिल्यांदाच उपक्रम

सध्या राज्यात कोरड्या हवामानाची स्थिती आहे. त्याचप्रमाणे आकाशही निरभ्र आहे. त्यामुळे थंडीला पोषक वातावरण निर्माण झाले आहे. सध्या कोकण विभागातील तापमानातही घट होत आहे. उत्तरेकडे नव्याने पश्चिमी चक्रवाताची स्थिती तयार झाली आहे. पाकिस्तानपासून चक्रीय वारे तयार झाले आहेत. त्यामुळे जम्मू-काश्मीरसह हिमालयीन विभागात ११ ते १३ जानेवारी या कालावधीत पुन्हा बर्फवृष्टी जोर धरण्याची शक्यता आहे. परिणामी उत्तरेकडील थंड वाऱ्यांचा प्रभाव पुन्हा वाढून महाराष्ट्रातील तापमानात २ ते ३ अंशांनी घट होण्याचा अंदाज आहे. त्यामुळे थंडीचा कडाका आणखी वाढेल.