पुणे : कात्रज चौकातील उड्डाणपुलाच्या कामानिमित्त करण्यात आलेले वाहतूक बदल मागे घेण्यात आले आहेत. या भागातील वाहतूक शनिवारपासून पूर्ववत करण्यात आली. उड्डाणपुलाच्या कामानिमित्त राष्ट्रीय महामार्ग विभागाने दिलेल्या सूचनेनुसार २९ नोव्हेंबर २०२४ पासून कात्रज चौकातील वाहतूक व्यवस्थेत बदल करण्यात आला होता. या भागातून जाणाऱ्या वाहनांना पर्यायी मार्गांचा वापर करण्याच्या सूचना देण्यात आल्या होत्या.
वाहतूक बदलामुळे या भागातील रहिवाशांना दररोज दोन ते तीन किलोमीटरचा वळसा घालून इच्छितस्थळी जावे लागत होते. गेले सहा महिने या भागातील वाहतूक पर्यायी मार्गाने वळविण्यात आली होती. ‘कात्रज चौकातील उड्डाणपुलाचे काम (सेगमेंटल लाँचिंग) पूर्ण झाल्यानंतर शुक्रवारी मध्यरात्रीपासून या भागातील वाहतूक पूर्ववत करण्यात आली,’ अशी माहिती वाहतूक शाखेचे प्रभारी पोलीस उपायुक्त डाॅ. संदीप भाजीभाकरे यांनी दिली.
