ठाणे : शिवसेना उद्धव बाळासाहेब ठाकरे पक्षाचे नेते माजी खासदार राजन विचारे यांनी मंगळवारी नवनियुक्त मीरा-भाईंदर पोलीस आयुक्त निकेत कौशिक यांची भेट घेऊन त्यांना शुभेच्छा दिल्या. त्याचबरोबर मीरा-भाईंदर शहरात शाळा, कॉलेजमधील विद्यार्थी इलेक्ट्रिक सिगारेटचा वापर मोठ्या प्रमाणात करत असतात दिसून येत असून हे प्रकार रोखण्यासाठी शाळा, कॉलेज परिसरातील पानटपरीवर इलेक्ट्रिक सिगारेट विक्री करणाऱ्यांवर कारवाई करा अशी मागणी विचारे यांनी केली आहे. तसेच पान टपरीवर ई सिगारेट विकणाऱ्याना पोलिसी खाक्या दाखवा असेही ते म्हणाले.
शिवसेना उद्धव बाळासाहेब ठाकरे पक्षाचे नेते माजी खासदार राजन विचारे यांनी मंगळवारी नवनियुक्त मीरा-भाईंदर पोलीस आयुक्त निकेत कौशिक यांची भेट घेऊन त्यांना शुभेच्छा दिल्या. यावेळी संपर्कप्रमुख नरेश मनेरा, मीरा-भाईंदर जिल्हाप्रमुख प्रभाकर म्हात्रे उपजिल्हाप्रमुख मनोज मयेकर महिला आघाडी नीलम धवन , प्रकाश जैन उपस्थित होते. या भेटीदरम्यान विचारे यांनी आयुक्त कौशिक यांना एक पत्रही दिले. त्यामध्ये मिरा-भाईंदरमध्ये शाळा, कॉलेज परिसरात ई सिगारेटची विक्री होत असल्याची बाब त्यांच्या निदर्शनास आणून दिली.
मीरा-भाईंदर शहरातील वाढत्या लोकसंख्येमुळे अनधिकृत अनेक शाळा आणि कॉलेज त्याचबरोबर क्लासेस यांचेही प्रमाण तितकेच वाढलेले आहे. प्रशासनाचे अंकुश सुटल्याने मुलांकडे शिस्तीचे धडे देणे याकडे शिक्षकांचे दुर्लक्ष झाले आहे. कारण यापूर्वी कॉलेज पासून मुलांना अमली पदार्थाचे व्यसन सुरू होत होते. परंतु आता इयत्ता पाचवी ते सातवी पासुनच मुलांना अमली पदार्थाचे व्यसन सुरू झाले आहे, असे विचारे यांनी पत्रात म्हटले आहे.
सध्या मुले वयात येण्याची प्रक्रिया अधिक वेगाने वाढत असल्याने सोशल मीडियाचा आधार घेऊन मुलांमध्ये लैंगिक इच्छा होणे, मद्यपान करणे, गांजा सेवन तसेच सिगारेट ओढणे, अशी ओढ मुलांमध्ये अधिक दिवसेंदिवस वाढत चालली आहे. तसेच नव्याने सुरू झालेली वेगवेगळ्या फेवरमध्ये इलेक्ट्रिक सिगारेट या पान टपरीवर विक्री केल्या जातात. याचीच सुरुवात सिगारेट आणि नंतर गांजा यामध्ये होत आहे.
त्यामुळे ई-सिगारेटची पान टपरी बरोबर सायकलवर विक्री करणाऱ्या इसमांवर कारवाई करा. तसेच शाळा कॉलेज परिसरात पोलिसांची गस्त वाढून एखादा विद्यार्थी जर नशा करताना दिसल्यास शाळेची प्रतिमा नष्ट होईल याचा विचार न करता त्या मुलाला त्यांच्या आई-वडिलांना स्वाधीन करून त्यांना योग्य समज द्या अशी मागणी विचारे यांनी मीरा-भाईंदर पोलीस आयुक्तांकडे पत्राद्वारे केली आहे.
यासंदर्भात लवकरच ठाणे आणि नवी मुंबई पोलीस आयुक्तांची ही भेट घेणार आहे असे त्यांनी सांगितले. अन्न व औषध प्रशासन विभागाकडून गुटखा व्यतिरिक्त अद्याप कोणतेही कारवाई केली जात नाही यासाठी शासनाने धोरण निश्चित केले पाहिजे व यांच्यावर बंदी घातली पाहिजे, असेही विचारे म्हणाले.
