IPL 2025 : आयपीएल फायनलमध्ये कृणाल पांड्याचा दबदबा, १८ वर्षांत कोणालाच जमली नाही अशी कामगिरी!

बंगळुरूने प्रथम फलंदाजी करताना निर्धारित २० षटकांत ९ बाद १९० धावांपर्यंत मजल मारली होती. १९१ धावांचं लक्ष्य घेऊन मैदानात उतरलेल्या पंजाबला केवळ ७ बाद १८४ धावांपर्यंत मजल मारता आली. बंगळुरूच्या गोलंदाजांनी शेवटपर्यंत पंजाबच्या फलंदाजांवर अंकूश ठेवल्याने बंगळुरूला हा सामना जिंकता आला. बंगळुरूचा फिरकीपटू कृणाल पांड्या या विजयाचा शिल्पकार ठरला. त्याने ४ षटकांत अवघ्या १७ धावा देत दोन महत्त्वाच्या फलंदाजांना बाद केलं. तर, भुवनेश्वर कुमारने चार षटकांत ३८ धावा देत दोन बळी घेतले. तसेच यश दयाल, जॉश हेझलवूड व रोमारियो शेफर्डने प्रत्येक एक बळी टिपत कृणालला चांगली साथ दिली.

कृणाल पांड्याची उत्कृष्ट कामगिरी

दरम्यान, कृणाल पांड्याने या कामगिरीसह मोठा इतिहास घडवला आहे. दोन आयपीएल फायनलमध्ये सामनावीराचा पुरस्कार पटकावणारा तो एकमेव खेळाडू ठरला आहे. आतापर्यंत आयपीएलच्या १८ मोसमात १६ वेगवेगळ्या खेळाडूंनी हा पुरस्कार पटकावला आहे. तर कृणाल पांड्याने हा पुरस्कार दोन वेळा पटकावला आहे. याआधी त्याने मुंबई इंडियन्सकडून खेळताना २०१७ च्या आयपीएल फायनलमध्ये अशीच कामगिरी केली होती. त्या सामन्यात कृणालने अष्टपैलू कामगिरी केली होती. आधी चार षटकांत ३१ धावा दिल्या होत्या. त्यानंतर त्याने फलंदाजी करताना ३८ चेंडूत ४७ धावांची निर्णायक खेळी केली होती.

आयपीएलच्या मागील १८ हंगामांच्या १८ फायनलमधील सामनावीर

आरसीबीची पंजाबवर मात

या सामन्यात पंजाब किंग्जचा कर्णधार श्रेयस अय्यरने नाणेफेक जिंकून बंगळुरूला फलंदाजीसाठी आमंत्रित केलं होतं. पंजाबच्या गोलंदाजांनी चांगली कामगिरी करत आपल्या कर्णधाराचा निर्णय सार्थ ठरवला. काईल जेमिसन व अर्शदीप सिंगने प्रत्येक ३ बळी घेत बंगळुरूच्या फलंदाजीचंकंबरडं मोडलं. बंगळुरूकडून विराट कोहलीने सर्वाधिक ४३ धावा जमवल्या. तर, त्याला कर्णधार रजत पाटीदार (२६), जितेश शर्मा (२४), लियाम लिव्हिंगस्टन (२५), मयंक अग्रवाल (२४) या चौघांनी चांगली साथ दिली.