Maharashtra News Highlights: “…म्हणून ठाकरे बंधूंनी एकत्र यावं”, मनसे-ठाकरे गटाच्या युतीबाबत काँग्रेसच्या नेत्याचं विधान

“२०२४ च्या महाराष्ट्र विधानसभा निवडणुकीत मी निवडून आलो असतो तर एकनाथ शिंदे पुन्हा एकदा मुख्यमंत्री झाले असते” असे वक्तव्य शिवसेनेचे (शिंदे) नेते व माजी आमदार शहाजीबापू पाटील यांनी केलं आहे. “मागच्या वेळेस मी निवडून आलो तेव्हा उद्धव ठाकरे अडीच वर्षे आणि एकनाथ शिंदे अडीच वर्षांसाठी मुख्यमंत्री झाले होते”, असेही पाटील यांनी यावेळी म्हटले आहे.

सविस्तर वाचा

"मी याआधी देखील सांगितलं की राजकारणातील मतभेद, मग तत्वाचे किंवा विचाराचे मतभेद असू शकतात. त्यामुळे कोणी एकत्र येत असेल तर काहीही हरकत नाही. आता राज ठाकरे किंवा उद्धव ठाकरे यांचा एकत्र येण्याचा विचार केला तर त्यांना एक परंपरा आहे.त्यांच्या आजोबांपासूनची ती परंपरा आहे. पुरोगामी विचारांचं महत्वाचं व्यक्तीमत्व म्हणून त्यांचे आजोबा होते. शेवटी जर जनतेच्या हितासाठी राज ठाकरे किंवा उद्धव ठाकरे एकत्र येत असतील आनंद आहे. पण ते पुरोगामी विचारांना आणि लोकशाहीला जपण्यासाठी एकत्र यावेत अशी अपेक्षा आहे", असं बाळासाहेब थोरात यांनी म्हटलं आहे.

पुण्यातील परशुराम आर्थिक विकास महामंडळाच्या नवीन इमारतीच्या उद्घाटनावरून महायुतीत नाराजी नाट्य रंगल्याचं पाहायला मिळालं. अजित पवार यांनी नवीन इमारतीचं उद्घाटन भाजपाच्या खासदार मेधा कुलकर्णी या येण्याच्या आधीच केलं. त्यामुळे मेधा कुलकर्णी यांनी अजित पवार यांच्यासमोर नाराजी व्यक्त केली. त्यानंतर अजित पवार यांनी पुन्हा इमारतीचं उद्घाटन केलं. या घडामोडीमुळे महायुतीतील नाराजी नाट्य समोर आलं आहे.