Maharashtra News : मनसेचे नेते वसंत मोरे यांच्या मुलाला जीवे मारण्याची धमकी

हवामान विभागाने वर्तवलेल्या अंदाजानुसार अनेक ठिकाणी वादळीवाऱ्यासह पावसाने हजेरी लावली. याच पावसाचा फटका आता निफाड तालुक्यातील उगाव येथील द्राक्ष उत्पादक शेतकरी भाऊसाहेब पानगव्हाणे यांना बसला आहे. त्यांची अक्षरश: दोन एकर द्राक्ष बाग ही आलेल्या वादळी वाऱ्यासह पावसाने जमीनदोस्त झाली. या शेतकऱ्याचे लाखो रुपयांचे नुकसान झाले आहे. मोठ्या कष्टाने या शेतकऱ्याने द्राक्ष बाग जगवली. मात्र आलेल्या वादळी पावसाने या द्राक्षबाग भुईसपाट झाली आणि शेतकऱ्याला आर्थिक कोंडीत सापडला आहे.

चोपडा शहरासह तालुक्यात सोमवारी संध्याकाळी अचानक आलेल्या वादळामुळे नागरिकांसह शेतकऱ्यांची धावपळ झाली. मात्र शेतातील उभे असलेले पीक या वादळामुळे जमिनीवर आडवे पडले असल्याने शेतकऱ्यांचे मोठ्या प्रमाणावर नुकसान झालेले आहे. शेतातील पीक डोळे समोर आडवे पडलेले पाहून शेतासाठी लागलेला खर्च कसा निघेल या संकटात सापडला आहे. तर काही दिवसांपूर्वी जिल्हा बँकेकडून शेतकऱ्यांना मालमत्ता जप्तीची नोटीस आल्याने तीच चिंता असताना निसर्गाने या वादळामुळे हाता तोंडाशी आलेला घास हिरावून घेतला आहे. शेतातून निघणाऱ्या या उत्पन्नातून कर्ज फेडले गेले असते, कर्ज नाही तर कमीत कमी त्या कर्जावरील व्याज तरी फेडले गेले असते, अशी व्यथा नुकसानग्रस्त शेतकऱ्यांनी बोलून दाखवली. शासनाने तात्काळ पंचनामे करून शेतकऱ्यांना मदत द्यावी, अशी मागणी यावेळी शेतकरी करीत आहेत.

कोल्हापूरचे खासदार संजय मंडलिक यांचा मुलगा वीरेंद्र मंडलिक यांच्या वाढदिवसानिमित्त मुरगुड येथे काल बैलगाडी शर्यत पार पडली. या शर्यती दरम्यान तीन ते चार अपघाताच्या घटना घडल्यात. यामध्ये पाच जण किरकोळ जखमी झालेत. यातील काही अपघात मोबाईल कॅमेऱ्यात देखील कैद झालेत. एका अपघातामध्ये बैलगाड्यातून चालक फरपटत जात असल्याचं दिसत आहे. तर दुसऱ्या व्हिडिओमध्ये भरधाव बैलगाडी प्रेक्षकांमध्ये आल्यानं तीन ते चार प्रेक्षकांच्या अंगावरून ही बैलगाडी गेली. जिल्हाधिकाऱ्यांच्या परवानगी नाही बैलगाडी शर्यत झाली असली तरी यामध्ये घडलेल्या तीन ते चार अपघाताच्या घटनांमुळे ही बैलगाडा शर्यत चांगलीचं चर्चेत आली आहे.

मनसेचे नेते वसंत मोरे यांच्या मुलाला जीवे मारण्याची धमकी देण्यात आली आहे. मनसेचे नेते वसंत मोरे यांच्या मुलाचे बनावट विवाह सर्टिफिकेट बनवून अज्ञातांनी ३० लाख रुपयांची खंडणी मागितली आहे. सोबतच खंडणी दिली नाही तर गोळ्या घालण्याची धमकीही देण्यात आली आहे. याप्रकरणी भारती विद्यापीठ पोलिसात गुन्हा दाखल करण्यात आला आहे.

खासदार संजय राऊत यांचं राजकारण डबल ढोलकी बडवल्याप्रमाणे झालं असल्याची टीका भाजपचे राज्य प्रवक्ते राम कुलकर्णी यांनी केली आहे. महाविकास आघाडीची स्थापना झाली तेव्हा यूपीएचे नेतृत्व शरद पवारांनी करावं असं राऊत म्हणत होते. मध्यंतरी राहुल गांधी यांनी करावं असे सुचवलं. मात्र आता राहुल गांधी बॅक फुटवर असून त्यांच्या जागी उद्धव ठाकरे यांनी नेतृत्व करावं, असं सूचक वक्तव्य राऊतांनी केले आहे. एवढंच नाही तर ठाकरे दिल्लीला राहायला जाणार असल्याचे देखील त्यांनी सांगितले. त्यामुळे त्यांच्या सहकाऱ्यांनी राऊतांपासून सावध राहावं, अशी प्रतिक्रिया राम कुलकर्णी यांनी दिली आहे.

छत्रपती संभाजीनगर, गेल्या दोन - तीन दिवसापासून हवामानातील बदलाचे संकेत हवामान खात्याने दिले होते. त्या अनुषंगाने दोन दिवसापासून छत्रपती संभाजी नगर जिल्ह्यात तुरळक पाऊस सुरू होता. काल रात्री अचानक जोरदार अवकाळी पावसाला सुरुवात झाली. गंगापूर तालुक्यातील शिल्लेगाव , सिद्धनाथ वडगाव परिसरातील शेतकऱ्यांचे रब्बी हंगामातील उभे पिके गहू, हरभरा, कांदा, फळबाग अवकाळी पावसाने व गारपिटीने नुकसान होऊन भुईसपाट झाली आहे. यामध्ये शेतकऱ्यांचे अतोनात नुकसान झाले आहे.

बीड जिल्ह्यात मध्यरात्रीपासून अवकाळी पावसाने हजेरी लावली आहे. बीड, माजलगाव, गेवराई या तालुक्यात अवकाळी पाऊस झाला असून काही भागात गारपीट देखील झाली. तर या पावसाने काढणीला आलेल्या गव्हाचं नुकसान झाले आहे. वादळी वाऱ्यासह अवकाळी पाऊस झाला त्यामुळे गहू, हरभरा, फळबाग याला देखील याचा तडाका बसला आहे. माजलगाव तालुक्यातील हे चित्र आहे. यात वादळी वाऱ्याने गव्हाचे पीक अक्षरशः जमीनदोस्त झाले आहे. त्यामुळे शेतकऱ्यांच्या हातात तोंडाशी आलेला घास हिरावला गेला आहे.