‘झी मराठी’ वाहिनीवर काही दिवसांपूर्वी काही टीझर पाहायला मिळाले होते. ज्यामध्ये ‘करणार तेव्हा कळणार, आता मज्जा येणार’ असं म्हणताना काही महिला दिसल्या होत्या. तेव्हापासून हा नवा रिअ‍ॅलिटी शो नक्की काय असणार? याची चर्चा सुरू झाली. अखेर ‘झी मराठी’च्या पुरस्कार सोहळ्यात हा नवा शो काय असणार? आणि या शोच्या सूत्रसंचालनाची धुरा कोण सांभाळणार हे उघडं झालं.
‘जाऊ बाई गावात’ असं या नव्या रिअ‍ॅलिटी शोचं नाव असून पुन्हा एकदा या शोच्या माध्यमातून लाडका राणादा म्हणजेच अभिनेता हार्दिक जोशी प्रेक्षकांच्या भेटीस येणार आहे. आता या शोमधील दोन दमदार स्पर्धक जाहीर झाले आहेत. तसेच शो कधीपासून सुरू होणार? हे देखील समोर आलं आहे.
हेही वाचा – “अखेरचा हा तुला दंडवत…” ‘सुख म्हणजे नक्की काय असतं’ मालिकेतील अभिनेत्रीची भली मोठी भावुक पोस्ट, म्हणाली…
‘झी मराठी’वरील ‘जाऊ बाई गावात’ या नव्या रिअ‍ॅलिटी शोचा आज एक नवा प्रोमो प्रदर्शित झाला आहे. हा प्रोमो ‘मराठी टीव्ही इन्फो’ या इन्स्टाग्राम पेजवर शेअर करण्यात आला आहे. ज्यामध्ये दोन दमदार स्पर्धकांची ओळख करून दिली आहे. एक आहे पापा की परी संस्कृती साळुंखे. जिचा चॉईसच महाग आहे, क्लिनिकल सायकॉलॉजिच्या डिग्रीचा तिला अभिमान आहे, तिच्या समोर कोणी काहीही लपवू शकत नाही. तर दुसरी स्पर्धक आहे, श्रीमंत घरची नात जिला घाबरतात सर्व घरात अशी स्नेहा भोसले. जी लेडी डॉन आहे, तिच्या किक बॉक्सिंगचा सगळीकडे बोलबाला आहे. अशा या ऐशोआरामात वाढलेल्या या शहरी मुली गावरान आयुष्य जगू शकणार का? हेच ‘जाऊ बाई गावात’ या शोमध्ये पाहायला मिळणार आहे.
हेही वाचा – भावंडांबरोबर जुई गडकरीने ‘अशा’ पद्धतीने केल्या होत्या चोऱ्या; अभिनेत्री किस्सा सांगत म्हणाली…
ही तर फक्त सुरुवात आहे, हळूहळू तुमच्या समोर एकापेक्षा एक व्यक्तिमत्वाचे स्पर्धक उलगडणार आहेत. एक अफलातून संकल्पना असलेला हा नवीन रिअ‍ॅलिटी शो ‘जाऊ बाई गावात’ २७ नोव्हेंबर पासून सोमवार ते शनिवार रात्री ८.३० वाजता प्रसारित होणार आहे. त्यामुळे आता प्रेक्षकांची उत्कंठा वाढली आहे.
