गतीमंद मुलीवर लैंगिक अत्याचार केल्याप्रकरणी तिघांविरोधात गुन्हा…

पीडित मुलगी १८ वर्षांची असून गतीमंद आहे. ती कुटुंबियांसोबत पूर्व उपनगरात राहते. गेल्यावर्षी डिसेंबर महिन्यात पीडित मुलीसोबत गैरप्रकार झाल्याचा आरोप तक्रारीत करण्यात आला होता. पीडित मुलीला त्वचा रोग झाला होता. त्याच्या उपचारासाठी ती रुग्णालयात गेली होती. त्यावेळी तीन आरोपींनी तिला तेथील एका झोपडपट्टीतील घरात नेऊन तिच्यावर अत्याचार केला. पीडित मुलगी गर्भवती असल्याचे निष्पन्न झाल्यानंतर तिला रुग्णालयात दाखल करण्यात आले. त्यावेळी हा प्रकार उघड झाला.

पीडित मुलीच्या आईच्या तक्रारीवरून पोलिसांनी तिघांविरोधात बलात्कार व पोक्सो कायद्याअंतर्गत गुन्हा दाखल केला. दोन आरोपींची ओळख पटली आहे. तिसरा आरोपी त्यांचा मित्र असल्याचे तक्रारीत म्हटले आहे. तसेच घटनास्थळाची माहितीही पोलिसांना देण्यात आली. पीडित मुलीच्या आईच्या तक्रारीच्या आधारे पोलिसांनी गुन्हा दाखल केला. घटना गेल्यावर्षी डिसेंबर महिन्यात घडली असून आरोपींचा शोध सुरू आहे.

अल्पवयीन मुलांविरोधात घडलेल्या गुन्ह्यांमध्ये वाढ

मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्ये वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. पोक्सो कायद्याअंतर्गत २०२३ मध्ये ११०८ गुन्ह्यांची नोंद झाली होती. मुंबईत २०२४ मध्ये पोक्सो कायद्याअंतर्गत दाखल गुन्ह्यांत ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.

२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याचे प्रमाण अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधात घडलेल्या अत्याचाराच्या घटनांमध्ये बहुसंख्य आरोपी परिचित व्यक्ती आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.