पुणे : वारजे भागात एका व्यावसायिकाला मारहाण करून पसार झालेल्या सराइतांना पोलिसांनी पकडले. गुन्हे शाखा युनिट तीन आणि वारजे पोलिसांच्या पथकाने ही कारवाई केली.
आशितोष नारायण साठे (वय २२, रा. मुळशी), ओम सचिन वनकुद्रे (वय १९) अशी अटक करण्यात आलेल्यांची नावे आहेत. याबाबत एका व्यावसायिकाने वारजे पोलीस ठाण्यात फिर्याद दिली होती. याप्रकरणात साठे आणि वनकुद्रे यांच्याबरोबर असलेल्या साथीदारांना अटक करण्यात आली होती. तक्रारदार भंगार माल खरेदीचा व्यवसाय करतात. आरोपी साठे, वनकुद्रे आणि साथीदारांनी व्यावसायिकाकडे काम करणाऱ्या टेम्पो चालकाला अडवून दारुसाठी पैसे मागितले. पैसे न दिल्याने टेम्पाची काच फोडली होती, तसेच त्याला मारहाण केली होती. या घटनेनंतर व्यावसायिक, त्यांचा मुलगा आणि भाच्याने आरोपींकडे विचारणा केली. तेव्हा आरोपींनी त्यांना बेदम मारहाण केली. त्यांना कोयत्याचा धाक दाखवून जिवे मारण्याची धमकी दिली होती.
गुन्हे शाखेचे पोलीस उपायुक्त निखील पिंगळे यांच्या मार्गदर्शनखाली वारजे पोलीस ठाण्याचे वरिष्ठ पोलीस निरीक्षक विश्वजीत काईंगडे आणि गुन्हे शाखेच्या युनिट तीनचे पोलीस निरीक्षक रंगराव पवार आणि पथकाने कारवाई करून पसार आरोपी साठे आणि वनकुद्रे यांना अटक केली.
