पुणे : महाराष्ट्र संघटित गुन्हेगारी नियंत्रण कायद्यान्वये (मकोका) कारवाई केल्यानंतर गेले तीन वर्ष पोलिसांना गुंगारा देणाऱ्या सराईताला वारजे पोलिसांनी अटक केली. आकाश सिब्बन गौड (वय २३, रा. .शिवणे, मूळ रा. गोरखपुर, उत्तरप्रदेश) असे अटक करण्यात आलेल्या सराईताचे नाव आहे. त्याच्याविरुद्ध वारजे माळवाडी आणि मार्केट यार्ड पोलीस ठाण्यात गंभीर गु्न्हे दाखल आहेत.
गौड आणि साथीदारांनी ५ ऑटोबर २०२२ रोजी क्रिकेट खेळताना झालेल्या वादातून शुभम मानकर याच्यावर कोयत्याने वार केले होते, तसेच त्याला दांडक्याने बेदम मारहाण करून गंभीर जखमी केले. याप्रकरणी वारजे माळवाडी पोलीस ठाण्यात खुनाचा प्रयत्न केल्याप्रकरणी गुन्हा दाखल करण्यात आला होता. गौड याच्यासह साथीदारांविरूद्ध वारजे पोलिसांनी ‘मकोका’ कारवाई केली होती. दरोड्याच्या गुन्ह्यात मार्केट यार्ड पोलीस ठाण्यातही गौडसह साथीदारांविरुद्ध ‘मकोका’ कारवाई करण्यात आली होती. कारवाईनंतर गौड पसार झाला होता.
पसार झालेल्या गौडचा शोध घेण्यासाटी वारजे पोलिसांचे पथक उत्तर प्रदेशातील गोरखपूर येथे गेले होते. त्याच्या नातेवाईकांसह मित्रांकडे चौकशी करण्यात आली. तेव्हा गौड तेलंगणा वास्तव्यास असल्याची माहिती मिळाली होती. तो वास्ताव्याचे ठिकाण सातत्याने बदलत होता. गौड हा वारजे-एनडीए रस्त्यावर असलेल्या शिवणे भागात आल्याची माहिती पोलीस उपनिरीक्षक संजय नरळे यांना २६ जून रोजी खबऱ्याने दिली. त्यानंतर शिवणे भागातील मैदानावर सापळा लावून त्याला ताब्यात घेण्यात आले.
अतिरिक्त पोलीसआयुक्त राजेश बनसोडे, उपायुक्त संभाजी कदम, सहायक आयुक्त भाऊसाहेब पटारे यांच्या मार्गदर्शनाखाली वारजे पोलीस ठाण्याचे वरिष्ठ पोलीस निरीक्षक विश्वजीत काईंगडे, गुन्हे शाखेचे निरीक्षक निलेश बडाख यांच्या मार्गदर्शनाखाली उपनिरीक्षक संजय नरळे,पोलीस कर्मचारी सागर कुंभार, गणेश शिंदे, योगेश वाघ, अमित शेलार, बालाजी काटे, निखील तांगडे, शरद पोळ, अमित जाधव, अमोल झणझणे, गोविंद कपाटे यांनी ही कामगिरी केली.
गुन्हे शाखेकडून फरार गुंड अटकेत
मकोका कारवाईनंतर फरार झालेल्या कात्रज भागातील सराईताला गुन्हे शाखेच्या युनिट दोनने अटक केली. रुपेश राजन केंद्रे (वय १९, रा. सच्चाईमाता मंदिराजवळ, कात्रज) असे अटक करण्यात आलेल्याचे नाव आहे. आंबेगाव पोलिसांनी केंद्रे आणि साथीदारांविरुद्ध मकोका कारवाई केली होती. कारवाईनंतर तो फरार झाला होता. तो कात्रज भागात आल्याची माहिती उज्ज्वल मोकाशी आणि शंकर कुंभार यांना मिळाली. पोलिसांनी सापळा लावून त्याला पकडले. अतिरिक्त पोलीस आयुक्त पंकज देशमुख, उपायुक्त निखील पिंगळे, सहायक आयुक्त गणेश इंगळे यांच्या मार्गदर्शनाखाली पोलीस निरीक्षक अंजुम बागवान, सहायक निरीक्षक आशिष कवठेकर, अमोल रसाळ, मोकाशी, कुंभार, शंकर नेवसे, संजय जाधव, निखील जाधव यांनी ही कारवाई केली.
