Heinrich Klassen Mobbed SRH fans in Hyderabad Mall Video: सनरायझर्स हैदराबादचा संघ यंदा तुफान फॉर्मात आहे. विविध विक्रमांची आपल्या नावे नोंद करत सर्वच खेळाडू आपली जबाबदारी पार पाडत आहेत. याचदरम्यान हैदराबाद संघाचा विस्फोटक फलंदाज हेनरिक क्लासेनला हैदराबादमधील चाहत्यांनी घेरलं, हैदराबादच्या एका मॉलमधील हा व्हीडिओ सध्या व्हायरल होत आहे. त्यावेळेस क्लासेनसोबत जयदेव उनाडकटही तिथे उपस्थित होता. क्लासेन मात्र चाहत्यांचं वागणं पाहून चांगलाच भडकला. हेनरिक क्लासेन हैदराबादमधील मॉलमधील संघातील खेळाडूंसोबत गेला होता. त्याला पाहताच SRH चाहत्यांनी गर्दी केली. क्लासेनसोबत जयदेव उनाडकटही होता. चाहत्यांनी गर्दी तर केली होतीच पण सोबतच त्यांच्या नावाचा जयघोषही सुरू होता. अशा गर्दीची सवय नसल्याने क्लासेन खूपच अस्वस्थ दिसला. गर्दी इतकी नियंत्रणाबाहेर गेली की अक्षरश सेल्फी आणि फोटोसाठी धक्काबुक्की सुरू होती. क्लासेन या गर्दीत अडकला होता आणि चारही बाजूंनी चाहत्यांनी त्याला घेरले होते. चारही बाजूंनी घेरलेल्या गर्दीवर हेनरिक भडकला हैदराबादमधील हेनरिक क्लासेनसोबत घडलेल्या घटनेचा व्हिडिओ सध्या सोशल मीडियावर व्हायरल झाला आहे. या व्हिडिओमध्ये त्याच्या चेहऱ्यावरील राग स्पष्टपणे दिसत होता. हेनरिक क्लासेन चाहत्यांना शांत होण्याचे आवाहन करतानाही दिसला. पण त्याचं कुणीही ऐकत नव्हतं आणि चाहते त्याच्यासोबत फोटो काढण्यासाठी सरसावत होते. क्लासेन अखेरीस चाहत्यांवर भडकला आणि पुढे जाताना दिसला. हेनरिक क्लासेन हा यंदाच्या मोसमात हैदराबादसाठी सर्वाधिक धावा करणारा दुसरा खेळाडू आहे. क्लासेनने १० सामन्यात १८९.३२ च्या स्ट्राईक रेटने ३३७ धावा केल्या आहेत, ज्यामध्ये ३ अर्धशतकांचा समावेश आहे. हैदराबाद संघाने या स्पर्धेत आतापर्यंत १० सामने खेळले आहेत. त्यापैकी ६ सामन्यात विजय, तर ४ सामन्यात पराभव पत्करावा लागला आहे. यामुळे संघ १२ गुणांसह टॉप-४ मध्ये आहे.
