Maharashtra News Highlights: बीडमध्ये १७ ऑक्टोबरला होणार छगन भुजबळांचा ओबीसी महाएल्गार मेळावा! ‘या’ नेत्यांना दिलं निमंत्रण

येत्या १७ ऑक्टोबर रोजी बीडमध्ये मंत्री छगन भुजबळ यांच्या उपस्थितीत ओबीसीचा महा एल्गार मेळावा होणार आहे. यावेळी मंत्री पंकजा मुंडे व आमदार धनंजय मुंडे यांना देखील निमंत्रण दिल्याची माहिती मेळाव्याचे आयोजक अॅड. सुभाष राऊत यांनी दिली. २ सप्टेंबर रोजी शासनाने मराठा आरक्षणाचा जीआर काढला आहे, तो रद्द करण्याच्या मागणीसाठी हा मेळावा होणार असल्याचे देखील राऊत यांनी सांगितले. दरम्यान, बीड मधील यापूर्वीचा मेळावा रद्द झाला होता. त्यावेळी जरांगे पाटील यांचे समर्थक गंगाधर काळकुटे यांनी हा मेळावा उधळून लावण्याचा इशारा दिला होता. त्याचा समाचार घेत सुभाष राऊत यांनी मेळावा उधळण्याची भाषा कोणी करू नये अन्यथा तुमचे काय धंदे आहेत ते आम्हाला शोधावे लागतील. राज्यभरात जे बॅनर लावले जातात त्यासाठी पैसा कुठून येतो, कोणत्या एजन्सीवर काय कामे घेतली आहेत हे देखील आम्हाला समोर आणावे लागेल असा इशारा सुभाष राऊत यांनी काळकुटे यांना दिला आहे.