लोटस तलाव बुजविण्याचा सिडकोचा डाव – जबाबदार अधिकारी, भराव करणाऱ्या कंपनीवर गुन्हा दाखल करण्याची मागणी

नवी मुंबई महापालिकेच्या हद्दीत असलेल्या पाणथळींकडे सिडको जाणीवपूर्वक दुर्लक्ष करते, असा पर्यावरणप्रेमींचा आरोप आहे. डीपीएस तलाव संरक्षित पाणथळ म्हणून संरक्षित झाल्यानंतर चाणक्य व एनआरआय पाणथळ जागाही संरक्षित करण्यासाठी पर्यावरणप्रेमी सातत्याने प्रयत्न करत आहेत. असे असताना सीवूड्स सेक्टर २७ भूखंड क्रमांक २ येथील जवळजवळ ७.५ हेक्टर परिसरातील लोटस पाणथळ तलावच बुजवून टाकण्याचा घाट सिडकोने घातला आहे. सोमवारी या ठिकाणी अनेक गाड्यांचा भराव टाकून तलाव बुजवण्याचा प्रयत्न सुरू केला आहे. पालिकेने याबाबत काम थांबवण्याचे आदेश दिलेले असताना मंगळवारीही या ठिकाणी कंपनीच्या गाड्या उभ्या आहेत. सिडकोने येथे एक सुरक्षारक्षकही नेमला आहे.

नवी मुंबई शहरातील सीवूडस सेक्टर २७, येथील लोट्स तलाव परिसरात अनेकवेळा राडारोडा टाकला जातो. याबाबत पर्यावरणप्रेमींनी पालिकेकडे सातत्याने तक्रार केली आहे. पालिकेनेही न्यायालयाच्या लोटस तलाव संरक्षित करण्याच्या आदेशानंतर या तलावाभोवती कोणीही अतिक्रमण करू नये, राडारोडा आढळल्यास संबंधितावर कायदेशीर कारवाई करण्यात येईल असे फलक लावले आहेत.

दुसरीकडे सिडकोने काही दिवसापूर्वी याच तलावाभोवती काही पत्रे ठोकले होते. तलाव संरक्षणासाठी सिडको करत असलेल्या या कृतीबद्दल पर्यावरणप्रेमींनी आनंद व्यक्त केला होता. मात्र आता सिडकोने तलाव बुजविण्याचा प्रयत्न सुरू केला आहे. याबाबत सिडकोचे अधिकारी चंदनशिवे यांना सतत संपर्क केल्यावरही संपर्क झाला नाही. तसेच सिडकोच्या जनसंपर्क अधिकारी प्रिया रातांबे यांच्याशीही संपर्क झाला नाही.

सिडकोच्या ज्या अधिकाऱ्याने जिल्हाधिकाऱ्यांना याठिकाणी पाणथळ असूनही अंधारात ठेवले व या तलावात भराव करण्याची परवानगी मागीतली त्याच्यावर गुन्हे दाखल करायला हवेत. नवी मुंबई महापालिका अधिकाऱ्यांनी मात्र तक्रारीवर तात्काळ कारवाई करत काम थांबवले आहे. – प्रदीप पाटोळे, याचिकाकर्ते व वकील

सिडकोच्या ज्या अधिकाऱ्याने भराव बाबतचे काम दिले आहे. तसेच जिल्हाधिकाऱ्यांना चुकीची माहिती देत फसवणूक केली आहे, त्या अधिकाऱ्यावरही गुन्हे दाखल करण्याची आवश्यकता आहे. एकीकडे रायगड जिल्ह्य़ातील कामाचा राडारोडा नवी मुंबईत आणून तो सुध्दा न्यायालयाने संरक्षित केलेल्या पाणथळ जागेत टाकून पर्यावरणाची हानी करण्याचा प्रयत्न केला आहे. त्यामुळे याला सिडकोच जबाबदार आहे. – सुनील अग्रवाल, सेव्ह मॅनग्रोव्हज् एन्व्हायर्नमेंट,नवी मुंबई.

नवी मुंबई महापालिकेने रायगड जिल्हाधिकाऱ्यांना न्यायालयाने दिलेल्या लोटस तलाव संरक्षित करण्याबाबतची संपूर्ण वस्तूस्थिती निदर्शनास आणून दिली आहे. संबंधित ठेकेदाराने तलावाभोवती लावलेले कुंपण तोडून भराव केलेला आहे. सद्यस्थितीला लोटस तलावामध्ये होत असलेल्या अनधिकृत कारवाया थांबवण्यात आल्या आहेत. – सोमनाथ पोटरे, उपायुक्त, परिमंडळ २, नवी मुंबई महापालिका

This quiz is AI-generated and for edutainment purposes only.

‘एन्व्हॉयर्नमेंट वॉक’

सीवूडस सेक्टर २७ येथील लोटस तलाव बुजवण्याचा घाट सिडकोने घातला असून रविवारी सकाळी ७ वाजता सेव एन्व्हॉयर्नमेंट संस्थेच्या वतीने या तलावाच्या ठिकाणी ‘एन्व्हॉयर्नमेंट वॉक’चे आयोजन करण्यात आलेले आहे.