पिंपरी : करोनामध्ये पुणे-लोणावळा दरम्यान दुपारी धावणारी लोकल बंद झाल्याने प्रवासी, विद्यार्थी, चाकरमानी, नोकरदार, पर्यटक यांचे हाल होत आहेत. त्यामुळे खासदार श्रीरंग बारणे, रेल्वे संघटना, प्रवाशांकडून दुपारी लोकल सुरु करण्याची मागणी केली जात होती. परंतु, आता त्यावर रेल्वे विभागाने स्पष्ट भूमिका घेतली आहे. रेल्वे ट्रॅकच्या देखभाल दुरुस्तीच्या कामासाठी पुणे ते लोणावळा दरम्यान दुपारी बारा ते तीन या वेळेत लोकल सुरु करणे शक्य नसल्याचे रेल्वेमंत्री अश्विनी वैष्णव यांनी खासदार बारणे यांना पत्राद्वारे कळविले आहे.
करोना साथ सुरू होण्यापूर्वी पुणे-लोणावळरदरम्यान लोकल गाड्यांचे संचालन व्यवस्थित सुरू होते. करोना साथीच्या कालावधीत रेल्वेची सेवाच बंद करण्यात आली. करोनानंतर देशात पूर्वीप्रमाणे सर्व रेल्वे सुरू झाल्या आहेत. करोना साथीच्या पूर्वी पुणे-लोणावळा दरम्यान सकाळी साडेअकरा ते दुपारी अडीच वाजताच्या कालावधीत दोन लोकल गाड्या चालवल्या जात होत्या. करोनाच्या साथीत या गाड्यांचे संचलन बंद केले होते. करोनाची साथ गेल्यानंतर पुन्हा दुपारी लोकल सुरु करण्याची मागणी केली जात होती.
पुणे-लोणावळा मार्गावर विद्यार्थी, महिला, शेतकरी, नोकरदार, पर्यटक अशा अनेक घटकातील हजारो प्रवासी प्रवास करतात. तळेगाव आणि पिंपरी-चिंचवड मधील औद्योगिक वसाहतींमध्ये दुसर्‍या पाळीमध्ये (शिफ्ट) कर्मचार्‍यांना कामावर येण्यासाठी साडेअकरा ते अडीच वाजताच्या कालावधीत येणार्‍या लोकलचा फायदा होत होता. त्यामुळे दुपारच्या वेळेत लोकल सुरु करण्याची मागणी खासदार श्रीरंग बारणे, रेल्वे संघटना, प्रवाशांकडून सातत्याने केली जात होती.
परंतु, लोकल सुरु झाली नाही. आता रेल्वेमंत्री अश्विनी वैष्णव यांनी ११ ऑगस्ट रोजी खासदार श्रीरंग बारणे यांना एक लेखी पत्र दिले आहे. त्यात रेल्वे ट्रकच्या देखभाल दुरुस्तीच्या कामासाठी पुणे ते लोणावळा दरम्यान दुपारी बारा ते तीन या वेळेत लोकल सुरु करणे शक्य नसल्याचे त्यांनी स्पष्ट केले आहे. त्यामुळे दुपारच्या वेळेत लोकल धावणार नसल्याचे स्पष्ट झाले.
खासदार श्रीरंग बारणे म्हणाले, दुपारच्या वेळेत पुणे ते लोणावळा दरम्यान लोकल सुरु करण्यासाठी लोकसभेत आवाज उठविला. तत्कालीन रेल्वे राज्यमंत्री रावसाहेब दानवे यांना ७ डिसेंबर २०२३ रोजी पत्र दिले. रेल्वेमंत्री अश्विनी वैष्णव यांनाही २० मे २०२५ रोजी लेखी पत्राद्वारे मागणी केली. परंतु, सकारात्मक प्रतिसाद मिळाला नाही.
