News Flash

“हे पाहिल्यावर मी तरी कधीच मास्क विसरणार नाही”; आनंद महिंद्रांनी शेअर केला मरीन ड्राइव्हवरील ‘तो’ व्हिडीओ

आनंद महिंद्रांनी ट्विट केलेल्या या व्हिडीओला एक लाखांहून अधिक व्ह्यूज मिळालेत

प्रातिनिधिक फोटो (फोटो सौजन्य: पीटीआय आणि ट्विटरवरुन साभार)

मुंबईमध्ये १० फेब्रुवारी ते ३० मार्च या ४८ दिवसांत एकूण ८५ हजार करोनाबाधित रुग्ण आढळले आहेत. मुंबईमध्ये पुन्हा एकदा करोना झपाट्याने वाढतोय. राज्यातील इतर भागांमध्येही करोना रुग्णांच्या संख्येत मोठी वाढ झाल्याचे पहायला मिळत आहे. याच पार्श्वभूमीवर रात्री आठ ते सकाळी सात दरम्यान जमावबंदीचे आदेश लागू करण्यात आले आहेत. १५ एप्रिलपर्यंत हे आदेश लागू राहणार आहेत. लॉकडाऊनची परिस्थिती निर्माण होऊ नये, करोना संसर्गावर नियंत्रण ठेवता यावं म्हणून त्रिसुत्रीचं पालन करण्याचं आवाहन केलं जात आहे. मास्क वापरणे, सतत हात धुणे आणि सोशल डिस्टन्सिंगचा अवलंब करणे आवश्यक असल्याचे नागरिकांना प्रशासनापासून ते नेत्यांपासून सेलिब्रिटींपर्यंत अनेकजण सांगत आहे. तरीही काहीजण याकडे दुर्लक्ष करताना दिसत आहेत. मात्र आता अशा बेजबाबदार नागरिकांना धडा शिकवण्यासाठी मुंबई पोलिसांनी चक्क त्यांना शाळेमध्ये देतात त्याप्रमाणे शिक्षा देण्यास सुरुवात केलीय. अर्थात सगळीकडे अशी शिक्षा केली जात नाही मात्र काही ठिकाणी बेशिस्त नागरिकांना अद्दल घडवण्यासाठी पोलिसांनी शिक्षा करण्याची वेगळीच कल्पना राबवलीय. उद्योजक आनंद महिंद्रांनी असाच व्हायरल एक व्हिडीओ सोशल नेटवर्किंगवर पोस्ट केला आहे.

आनंद महिंद्रा हे अनेकदा सोशल नेटवर्किंगवरुन व्हायरल आणि मजेदार व्हिडीओ शेअर करुन त्यावर व्यक्त होत असतात. त्यांनी नुकताच मुंबईतील असाच एक व्हिडीओ शेअर केलाय. “मुंबईतील मरीन ड्राइव्ह येथे तोंडावर मास्क घालण्यासंदर्भातील नियमांचे उल्लंघन करणाऱ्यांना मुंबई पोलिसांनी अशाप्रकारे कोंबडा बनवून चालवत शिक्षा केली. मला हा व्हिडीओ सिग्नल अॅपवर मिळाला. मी बोर्डींग स्कुलमध्ये होतो तेव्हा अशी शिक्षा ही सामान्य गोष्ट होती. थोडी मजेदार पण हे असं चालताना खूप थकायला व्हायचं. हे पाहून मी कधीच माझं मास्क विसरणार नाही,” असं आनंद महिंद्रांनी हा व्हिडीओ ट्विट करताना म्हटलं आहे. या व्हिडीओमध्ये मुंबईच्या मरिन ड्राइव्हर काहीजणांना पोलिसांनी बेडुक उड्यांप्रमाणे चालण्यास सांगितल्याची शिक्षा केल्याचं आणि त्यांच्यावर एक पोलीस हवालदार लक्ष ठेवत असल्याचं दिसत आहे. मास्क न घालणाऱ्यांना भर उन्हात ही शिक्षा करण्यात आलीय.

आनंद महिंद्रांनी ट्विट केलेल्या या व्हिडीओला एक लाखांहून अधिक व्ह्यूज आहेत.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on March 31, 2021 12:06 pm

Web Title: anand mahindra reacts as face mask rule violators at marine drive in mumbai punish by mumbai police scsg 91
टॅग : Coronavirus
Next Stories
1 Suez Canal Ship Video: सुएझ कालव्यातून निघताना त्या जहाजाने वाजवला ‘धूम’चा हॉर्न? Video बघून नेटकरी हैराण
2 कठोर मेहनतीमुळे ‘प्रमोशन’ झालं, आनंदात ‘ड्रिंक’ केल्याने दुसऱ्याच दिवशी सुट्टी मागितली; बॉसचं उत्तर व्हायरल
3 मोदींचं ते हस्ताक्षर खरं की खोटं?; आधीच लिहिलेल्या संदेशावर स्वाक्षरी करतानाचा व्हिडीओ आला समोर
Just Now!
X