Maharashtra Breaking News Updates : “अशी भाषा गावगुंड वापरतात”, प्रकाश महाजनांचा नारायण राणेंना टोला

"महाराष्ट्राचे माजी मुख्यमंत्री राहिलेल्या, केंद्रीय मंत्रिपद भूषवलेल्या नारायण राणे यांनी 'प्रकाश महाजन कुठे बोलवेल तिथे मी येतो', अशा पद्धतीची भाषा करणं त्यांना शोभत नाही. अशी भाषा गावगुंड वापरतात", असं म्हणत मनसे नेते प्रकाश महाजन यांनी नारायण राणे यांना टोला लगावला आहे. महाजन म्हणाले, "एकटा भेट मग तुला सांगतो, उलटं टांगणं म्हणजे काय असतं ते दाखवतो ही नारायण राणेंची धमकी आहे. ते आणि त्यांचे कार्यकर्ते मला मारण्याची धमकी देत आहेत. माझं त्यांना एकच सांगणं आहे, मी इथे उभा आहे. मला मारायचे असेल तर मी पुणे किंवा कणकवलीत यायला तयार आहे. माझी कुठेही यायची तयारी आहे. मी कधी नारायण राणे यांना आव्हान दिलेलं नाही. तुम्ही या तुम्हाला बघतो, उलटा टांगतो वगैरे बोललो नाही. कारण मला माहिती आहे ते माजी मुख्यमंत्री आहेत. मात्र त्यांची पत्रकार परिषद एखाद्या वरिष्ठ भाजपा नेत्याने पाहिली तर त्यांना काय वाटेल?"

आमदार रोहित पवार म्हणाले, "दोन पक्ष एकत्र येणार असल्याची केवळ चर्चा ऐकायला मिळतेय. हे केवळ तिथपर्यंतच मर्यादित आहे. त्यावर आपण सर्वांनी बोलून वेळ का घालवावा? बैठकांसाठी, शेतकरी प्रश्नांवर चर्चेसाठी शरद पवार व अजित पवार एकाच व्यासपीठावर एकत्र येतात, मात्र त्याचा पक्षांशी संबंध नसतो. विलिनीकरणाबाबत शरद पवार किंवा खासदार सुप्रिया सुळे कधीच काही बोलल्या नाहीत. आम्ही देखील या मोठ्या नेत्यांना भेटल्यावर केवळ शेतकरी, कष्टकरी, युवा, बेरोजगारांच्या प्रश्नांवर चर्चा करतो. शरद पवार आम्हाला विचारतात, शेतकऱ्यांसाठी काय करणार आहात? युवकांसाठी काय करणार आहात? बाकी विलिनीकरणाच्या चर्चा केवळ माध्यमांवर रंगतायत.